Нижний Новгороддагъы стадионгъа жыйылгъан ерли  «Волганы» къаравчуларында «Волга» «Анжини» енгежегине шеклик ёкъ эди. Дагъыстандан ва Москвадан о оюнгъа гелген «Дикая дивизияны» якъчылары буса «Анжи» утажагъына инана эдилер.

Футбол майданны есилери оюнну оьзлени къолуна алма гьаракат этди. «Анжи» буса тындырыкълы кюйде оьз къапусун да якълап, гери чапгъынларын къурма башлады. Биринчи таймны ортасында «Волганы» футболисти Уридия Кержаковну къапусуна гийирген голну судья,  офсайд  гьисаплап, санамады. Эки де команда яхшы оюн да, гьаракатлыкъ да, сезонну башына гёре яхшы физика гьазирлик де гёрсетип, 0-0 санав булан танапусгъа гетди.

Экинчи таймда «Анжини» футболистлерини класы бираз оьрде экени  гёрюндю, «Волганы» къапусуну алдында къоркъунчлу мюгьлетлер бирини артындан бири болма башлады. Элли бешинчи минутда Магьаммат Митришев Комаровну къапусуна гючюн салып урду, Комаров топну не тутуп, не гери уруп болмады. Топ да къапуну гёнделен багъанасына тийип, футбол майдангъа къакълыкъды, бу ерде алдынлыкъ этип, топгъа Шамил Асилдаров етди ва башы булан топну къапуну бош мююшюне гийирди – 1-0.

Голдан сонг да, бизинкилер чапгъынларын давам этди. Етмишинчи минутда Али Гьажибеков, Чуперканы штрафнойдан берген пасындан пайдаланып, бек уста кюйде башы булан «Волгагъа» экинчи гол гийирди.  Сексен биринчи минутда буса Сердер Сердеров Нижний Новгородгъа уьчюнчю голну да «юкледи» – 0-3.

Арадан минут да гетмей, «Анжини» алдынгъы  футболисти Илья Кухарчук, арекден уруп, Кержаковну къапусуна гол гийирди – 1:3. Шу санав булан оюн да битди. Натижада, «Анжи» уьч оюндан сонг етти очко да къазанып, турнир таблицада биринчи ерге ес болуп токътады.

Оюндан сонг «Волганы» баш тренери Талалаев оьзюню баянлыгъында: « Бугюн «Анжи» бизден гючлю эди», – деп мюкюр болду. Сергей Ташуев – «Анжини» баш тренери буса: «Оюнну санавуна разимен, команданы чапгъынларын къурагъан кююне разимен, тек оьз къапусун якълайгъан кююне, айры футболистлеге сёзюм бар!» – деди.

            Айны 27-нде Каспийскиде «Анжи Арена» майданда «Анжи» аштарханлы «Волгарь» булан ёлугъа.



 

СУРАТДА: Асилдаров оюнну санавун ачгъан вакъти.

 



Шарабутдин КИШИЕВ.