Магьачкъаладагъы Ленин район суд 2006-нчы йылда далапчы Мирза Магьамматовну ва ону 13 йыллыкъ уланын оьлтюрген деп айыпланагъан дёрт адамны эркинликден магьрюм этмек деген къарарны чыгъаргъан.
Белгили кюйде, 17 йыл алъякъда август айны 3-нде М.Магьамматов машини булан Къызылюртгъа гиреген ердеги кафени алдында токътагъан болгъан. Машинде уланы ва эки къызы да болгъан. Кафеден чыгъып гелеген вакътисинде М.Магьамма-товну алдына эки «Жигули» гелип токътагъан, ичинден бетлерине къара маскалар да гийген жинаятчылар автоматлар булан атышып бизнесменни оьлтюрген. Атасына кёмекге алгъасагъан уланын да аямагъанлар.
Ахтарывчулар токъташдырагъан кюйде, шо чапгъынны этгенлени арасында гьалиги Росгвардияны майору да болгъан, о заманлар ол ич ишлени Къызылюрт шагьар бёлюгюнде къуллукъ этген. Тутулгъанланы арасында Къызылюрт шагьар жыйынны депутатыны ва ерли школаны директоруну заместителини атлары да эсгериле. Олар барысы да Къызылюрт шагьарны башчысы Магьаммат Магьамматовну командасына гире болгъан.
Алав Алиев
