Артдагъы гюнлерде Донецк, Луганск, Запорожье ва Херсон бойгъа багъып гезикли рагьмулу кёмеги бакъдырылды. Эртенокъ Къызылюрт шагьаргъа гиреген ердеги аркъада жанланыв гьис этилди. Узакъ къалмай мунда шо биз оьрде эсгерген якъгъа барагъан автомашинлени колоннасы гелип токътады.Бу колоннаны Дагъыстанны Жамият палатасыны ортакъчылары, афгъан ветеранланы советини ёлбашчысы Магьаммат Арипов ва ветераны Магьамматрасул Сулейманов узата.
Оьзюню сёйлевюнде Магьаммат Арипов: – бу умпагьатлы кёмекни болдурувда савлай республиканы къурумлары, оланы арасында ДР-ни Жамият палатасы, Дагъыстанны къатынларыны союзу, ветеран къурумлары ва охув ожакълары къол ялгъады. Муна буссагьат Бавтогъай посёлокда ерлешген школа-интернатдан йиберилген исси ювургъанлар, сонг да караватланы пуржунлары автомашинлеге юкленди. Ондан къайры да, мунда гиччи яшлагъа Янгы йылны савгъатлары, асгерчилеге посылкалар ва охувчулар язып онгаргъан кагъызлар тёшелген, – деди.
Магьаммат Арипов инг башлап булай гьалда онгарылгъан кёмекни якъла-гъанлагъа, айрокъда Афгъанистанны Къызылюрт шагьардагъы ва райондагъы ветеранларыны атына айрыча разилик билдирди.
Эсгерилген чараны якълавда эндирейли Къанболат Салавов, солтанянгыюртлу Муса Аскерханов ва муцалавуллу запасдагъы подполковник Агьмат Гьюсейнов гьаракатчылыгъын болдурду.
Алибек САЛАВАТОВ.
Автор чыгъаргъан сурат.
