Алдындагъы гюнлерде Дагъыстанны Башчысыны борчларын заманлыкъгъа кютеген Фёдор Щукин сувдан агъып барагъан гиччипавну къутгъарывда гёрсетген къоччакълыгъы учун кёстекли Юлдуз Къазбековагъа Баракалла кагъыз тапшурду ва гюл байлам берди. 

Гертиден де, Юлдузну къоркъмай айлангъанына бек тамашалыкъ этесен, ол Абдулла Исламовну оьлюмден къутгъаргъан. Иш буса булай болгъан. 12-нчи майда 16 йыллыкъ Юлдуз Кёстекдеги Вартазан татавулну янында болгъан. Бирден муну къулагъына къычырагъан тавушлар эшитиле. Къарагъанда, татавулда киринип турагъан эки яшны бириси гёмюлюп барагъанны эс эте. 

Май айны башы бек сувукъ заман, шогъар да къарамай Юлдуз аякъгийимлерин чече ва кисесиндеги телефонун татавул ягъагъа да салып, сувгъа атыла. Батылып барагъан яш оьзюн къутгъарма гелгенни англай ва къоркъмакълыкъны гючюнден къызны къысып тута. Олар экевю де батылма башлайлар, тек шо вакъти Юлдуз яшны гьарангъа аркъасына айландыра ва тыныш алмагъа деп оьрге тебере, сонг елке боюндан тутуп, ягъагъа юзе. Насипге татавул бойгъа гелген уллулар гиччипавну, сонг Юлдузну чыгъаралар.

 – Къоркъмадынгмы сувгъа атылмагъа? – деген соравгъа Юлдуз: «Шо гьакъда ойлашма да ойлашмадым, яшны къутгъарма алгъасадым», – деп жавап бере. – Къыз уьйге сыкъмасув болуп гелгенде, мен не болгъанны сорадым, – дей атасы Солтансайит, – башлап урушма сюйдюм, сонг гьалны англатгъанда, бары да иш ачыкъ болду. 

Юртлулары гьали Юлдузну игитге гьисаплай, къутгъарылгъан яшны ата-анасы гелип Юлдузгъа баракалла билдиргенлер. 

Шо хабар район администрациягъа етишгенде, районну башчысы Багьавутдин Мамаев къызны ата-анасы булан администрациягъа чакъыргъан ва баракалла билдирген, савгъатлар тапшургъан. 

Дагъыстанны Башчысы Фёдор Щукин де ёлугъувгъа Юлдуз булан гелген анасы Кавсарат Къазбековагъа да яшны тарбиялагъаны учун баракалла билдирген.

 «Асил къылыкъ, рагьмулукъ, жавапчылыкъ, гьар заман гьар кимге де кёмек этмеге гьазирлик – шолар барысы да агьлюде салынагъан къылыкълардыр. Юлдуз шолай асил хасиятларын Дагъыстангъа да, савлай уьлкеге де гёрсетди. Сиз оьр даражалы адам, къоркъувсуз, гьайлы, намуслу къызъяш оьсдюргенсиз. Къызны бу игитлиги де – дагъыстанлыланы инг яхшы адатлары наслудан-наслугъа гёчегенини арив мисалыдыр», – деди Фёдор Щукин къызны анасы Кавсаратгъа.

 Юлдуз Къазбекованы гьакъын­дагъы макъала Москвадагъы «Комсомольская правда» газетде де чыкъды. Гиччи игит Хасавюртдагъы технология янгылыкъланы коллежинде охуй. Юлдуз ону булан тамамланып къалма сюймей, бажарывлу программист болмакъ учун оьр билим алма да хыял эте. 

Юлдуз Къазбекова шо мурадына етишежекни де билебиз, неге тюгюл де огъар тийишли хасиятлар яшдан берли салынгъан.