Кёбюсю къаравчулар команданы къолайсызлыгъын баш тренери Гьажи Гьажиевден гёре, бирлери айрыча футболистлеге ачувлана, бирлери бары айыпны Сулейман Керимовгъа сала...

Оюнну «Анжи» гёнгюлсюз башлады. Футболистлени бир тайпасына къарагъанда чы, чемоданларын да жыйып, отпускагъа тыш уьлкелени курортларына барма гьазир болгъаны толу кюйде футбол ойнама пуршавлукъ этегенге ошай эди. Амма бары гючюн салып, къаравчуланы алдында бетин ярыкъ этме сююп ойнайгъанлар да бар эди.

Биринчи таймда «Анжи» топну оьзюнде сакъласа да, «Крылья Советовну» къапусуна этилеген чапгъынлар самаралылагъа айтардай къоркъунч бермеди. Экинчи таймны чы он беш минуту да гетмей, «Крылья Советовну» футболисти Артём Делькин, оьзюню командасыны кёп сийрек чапгъынларыны бирисинде «Анжиге» гол гийирди. Къаравчуланы оюнну гьар минуту сайын командагъа да, айрокъда ону баш тренерине де ачуву артса да, олар командагъа арт бермеди, нечакъы бола буса да команданы янын тутуп, оланы алгъа талпындырды. Сонг-сонг, болмасгъа бакъгъанда, башлап Гьажиевге, сонг команданы бир нече футболистлерине яхшы кюйде бир нече минг тамакъ къычырып, бир-экилени тутдурду. Гьажиевге чи бир вакъти бир трибунадан алып бир трибуна: «Гет, гет!» – деп де тувгъан эди.

Бенуа Ангбва буса, бек пашман кюйде стадиондагъы микрофонну да алып, къаравчулагъа оьзлерден гечмекни тиледи: «Мен гетмежекмен, команда къайда болса да, мен команда булан болажакъман», – деди.

«Анжини» генеральный директору Магьаммат Исаев мени алдан берли яхшы ювугъум. Янгылыкълар магъа етгендокъ, мен де шону бизин охувчулагъа  етишдирежекмен.

                                                                                Шарабутдин Кишиев.