Дагъыстанлыланы, оланы мал-матагьын ва шолай да ерли табии байлыкъларыбызны асувлу кюйде пайдаладырывгъа артдагъы йылларда айрыча тергев бакъдырыла демеге ярай.
Жамиятыбызны ичинде йимик табиатда да аманлыкъны болдурувгъа баккъыдырылгъан чаралар чакъда-чакъда оьтгерилегени де шону ачыкъдан ташдыра.

Бугюнлерде «Дагъыстан» деген маълумат агентлигинде Россияны къыставуллу гьалланы алдын алагъан управлениесини Дагъыстанда иш гёреген бёлюгюню башчысыны заместители полковник Муслим Девришбеков оьтгерген прес-конференциясы да уьстде эсгерилген агьамиятлы масъалагъа багъышлангъан эди.

– Дагъыстанны табии шартлары башгъа-башгъа, – деп башлады оьзюню баянын Муслим Шарапутдинович, – Буса да, тавда, тавтюпде, тюзлюк бойларда транспортда, от тюшювлерде, сув алывларда, сюрлюгювлерде болма имканлы къоркъунчлу гьалланы алдын алывну чараларын бары да ерде бирни йимик жаваплы кюйде янашып оьтгермеге герек бола. Ёгъесе, тас этивлени алдын алывда кемчиликлеге ёл берилежек. Айсениден ари бол, бир балагьгъа салыр ол деп негьакъ айтылмагъан. Айтмагъа сюегеним, яшавда, табиатда къаршылашагъан гьар тюрлю хатабалагьланы алддын алывуну масъаласына байлавлу болуп белгиленген борчлагъа сувукъ-салкъын янашыв зараллы.

Дагъыстанлыланы яшавлукъ шартларын яхшылашдырыв, белгили болгъан кюйде, заралны, тас этивлени алдын алмагъа кёмеклеше. Шону учун «Мени Дагъыстаным-мени ёлларым», «Мени Дагъыстаным – мени сувларым», «Онгайлы шагьар шартлар учун», «Асил ёллар – аманлыкъны ёллары» ва шолай оьзге тюрлю агьамиятлы проектлер яшавгъа чыгъарыла.
Сувда, агъачлыкъларда яз айларда болма имканлы гьар тюрлю балагьланы алдын алывгъа да тергевню гючлендирмесе, тас этивлени алдын алмагъа бажарылмай. Шону учун адамлар ял алагъан ерлерде аманлыкъны чараларын токъташдырма герек.

Артдагъы йылларда бизин республикабызгъа къонакълай гелеген турисистлени санаву артып тербей. Шо да оланы аманлыгъын гьисапгъа алып, МЧС-ни къуллукъчуларына ДР-ни оьзге тармакъ министерликлери, ерли муниципал къурулувларыны администрациялары булан байлавлукъда иш гёрмеге борчлу этегени гьакъ.

Аманлыкъны чараларын оьтгеривде англатыв ишлени юрютювде умуми рейдлер, учениялар асувлу экени гьакъда пресс-конференцияда айрыча эсгерилди.
Ахырында Муслим Девришбеков журналистлер берген соравлагъа жаваплар къайтарды. Шо гьакъда гележекде де генг кюйде маълумат бермеге умут этилине.