Буйнакск районну Тёбен Къазаныш юртундагъы Сали Сулейманны аты къоюлгъан спорт залда ябушувну грек-рим журасы булан машгъул болагъан яшёрюмлени белгили тренерлер ва айтылгъан кочаплар булан ёлугъуву оьтгерилди.

 

Ябушувну оьрде эсгерилген журасы юртлардагъы яшланы айрыча тергевюн тарта. Олар грек-рим ябушувну сырларына оьз­лер кёп сююп тюшюнмеге де къаст этелер. Озокъда, бу ерде олагъа пайдалы насигьатлар берип, узакъ йылланы боюнда топлагъан сынавларын уьйретип, уьст болма гьаваслыгъын­ болдуруп чалышагъан­ тренерлени де къошуму ёкъ тюгюл.  Шо жура спорт булан иштагьланагъан яшёрюмлер булангъы ёлугъувгъа грек-рим ябушувну Федерациясыны Президенти, Дагъыс­тан Рес­публиканы Халкъ Жыйы­нында маданиятгъа, яшёрюмлени ишлерине, спортгъа ва туризмге къарайгъан комитетини председатели Мурат Пайзулаев,  районну башчысы Уллубий Ханмурзаев, атлары айтылгъан тренерлер ва спортну белгили усталары гелген эдилер.

Булай пайдалы сынав алышдырыв ва уьйретив ёлугъувну оьтгермекни сиптечиси болуп Буйнакск районну спорт школасы арагъа чыкъгъан.

Грек-рим ябушув спортну бу журасы булан машгъул айтылгъан кочапланы яхшылыгъындан савлай дю­ньягъа танывлу ва ону ях­шы абуру да бар, гьатта Олимпия оюнланы программасына да къошулгъан.

– Бугюн бу спорт залгъа гелип, яшавун ябушув булан байлагъан­ гьар  яшёрюм оьзюню къастына, гьаракатына гёре гележекде шексиз кюйде чемпион атны къазанмагъа да имканлы, –  деп башлады сёйлевюн М. Пайзулаев. – Биз танглагъан ёлубузда, касбу ишибизде топлагъан сынавланы, сырланы ичибизде сакълап турмайлы, табанларыбызны таптап гелеген, оьрлюклеге етишме муштарлы яшёрюмлеге тапшурмагъа борчлубуз. Заманлар гетип, сизин ара­гъыздан халкъара ярыш­ларда ортакъчылыкъ этежек кочаплар да чыгъар. Озокъда, яхшы, бажарывлу спортчу болмакъ азлыкъ эте. Шону учун мен сизин гьаригизни спорт залда да, школадагъы партаны артында да бек белсенип, иштагьлы кюйде чалышмагъа чакъыраман.

Буйнакск районну баш­чысы Уллубий Ханмур­заев  грек-рим ябушув спортну оьсювюне этеген къошуму учун Мурат Магьамматовичге гьакъ юрекден разилигин бил­дире туруп: – Булай сынав алышдырывланы чакъда-чакъда оьтгере турмакъны уллу маънасы бар. Физкультура ва спорт адамны низамлы болма уьйретегенден къайры, савлугъун беклешдире, гьар не четим гьалланы да енгил кюйде гечирме, оьрлюклеге етишме ёл ача, чыныкъдыра. Яхшы къастлы, тавакелли адамлар юрегине тутгъан уллу муратларына етишме де бажаралар, – деп эсгерди. Сонг ол физкультураны ва спортну оьсювюне этеген лайыкълы къошуму саялы М. Пайзулаевге, районну спорт школасыны тренерлерине баракалла кагъызлар тапшурду.

Шо гюнгю ёлугъувну барышында халчаны усталары ябушувну не ёрукъда ва нечик башлама, узатма, четим гьаллардан не къайдада чыкъма болагъанын мекенли кюйде англатып,  оьзтёрече сырларын ачып гёрсетип турдулар.

Яш кочапланы белгили усталар булан сынав алышдырыву, олар берген дарслар гележекдеги ярышларда янгы оьрлюклеге ругьландырма болажагъына  шеклик этмеге тюшмей.

 

Казим КЪАГЬРУМАН.

СУРАТДА: ёлугъувну ортакъчылары Сали Сулейманны атындагъы спорт залда.