«Россия» деген выставка-форумда Дагъыстанны гюню оьтгери-легенде Республиканы Башчысы Сергей Меликов уьлкени тахша-гьарында яшай туруп, гьар тюрлю тармакъларда гёрмекли уьстюнлюклеге етишгенлеге акъча савгъатлар ва дипломлар тап-шургъан. Шо акъча савгъатлар тавлар элинден чыкъгъан пагьмулу жагьил адамланы якъламакъ учун токъташдырылгъан. Савгъатлар булан белгилевде РФ-ни спорт ябушувгъа къарайгъан федерациясыны вице-президенти Омар Муртазалиев, Олимпия оюнланы чемпиону Гьажимурат Магьамматов ва оьзге къонакълар да ортакъчылыкъ этген, олар алдынлы ерлени алгъанланы гьакъ юрекден къутлагъан.
«Йылны спортчусу» деген номинацияда биринчи, экинчи ва уьчюнчю ерлеге къумукъ уланлар ес болгъан.
Къарланюртлу (Хасавюрт район) Азнавур Отевов – грек-рим ябушувдан оьрюм яшланы арасында (2012-нчи йыл) Европаны чемпиону, Россияны дзю-додан жыйым командасыны члени, Москвадагъы спорт школаны тренери, Пачалыкъ Думаны депутаты С.Хамзаевни кёмекчиси.
Отевовланы агьлюсюнде бары да эргишилер спорт булан машгъул деме ярай. Уллатасы Зайналабит – СССР-ни спортуну устасы, атасы Айгъази тутушуп ябушувдан спортну устасына кандидат, иниси Россияны грек-рим ябушувдан чемпионатында экинчи ерни алгъан.
Шавхалтирменли (Магьачкъаланы Киров району ) Магьамматбек Темеев – спорт ябушувдан дюньяны эки керен чемпиону, спортну халкъара даражадагъы устасы, Россияны греэплинг ябушувдан жыйым командасыны члени.
Магьачкъалалы Болат Изутдинов — тхэквондо ябушувдан Россияны ва дюньяны чемпиону, спортну халкъара даражадагъы устасы, спорт ябушувдан Москваны жыйым командасыны тренери, Дагъыстан Республиканы Башчысы С.Меликовну жамият кёмекчиси.
Алав АЛИЕВ
