«Толу кюйде гьазирмен»

Муслим  САЛИХОВ:

 

 Белгили спортчу Муслим Салихов декабр айны 16-дан 17-сине чыгъагъан гече Лас-Вегасда (Американы Бирлешген Штатлары)  UFC 296 деген турнирде  гезикли ябушувун оьтгережек. Муслим Америкагъа гетгенче биз ону булан ёлугъуп,  бир нече сорав бердик.

 

– Ябушувгъа онча кёп де къалмагъан. Заманынгны къай­­да ва нечик оьтгересен?

– Виза булангъы масъала неге буса да созулуп тура. Мен чи Лас-Вегасгъа етишип, тренировкаларымны шонда узатма сюе эдим.  Тыш пачалыкъны элчиханасына арза бергенли арадан бир ай гетди. Тек арзама гёре кагъызларыма къарама алгъасамайлар. Гьали мен Кисловодскидемен.

– Виза берилмей къалмакъ бармы?

– Гьали бизин аралыкъланы гьисапгъа алгъанда, шо да болмайгъан зат тюгюл. Тек умут уьзмеймен. Гьатта ябушув болагъан гюн етишсем де къайырмайман. Мен толу кюйде гьазирмен.

– Артдагъы уьч ябушувдан сен экисин утдургъансан. Шо сагъа таъсир этмейми?

– Утдургъанман деп, ругь­дан тюшеген гиччи яш тюгюлмен чи. Мен оьз оьмю­рюмде ябуша гелгенмен. Магъа оьктем болмагъа да себеплер ёкъ  тюгюл. Артдагъы ябушувну айтгъанда, мени булан тогъатартма чыкъгъан спортчугъа утдурмадым, судьялагъа утдурдум. Олар чыгъаргъан къараргъа   адилли эди деп айтмагъа бир де тилинг айланмас.

– Сени дагъы да нече ябушувунг болажакъ?

– Бираз алда  дёрт ябушувгъа дыгъар байладым.

– Сени Лас-Вегасда къаравуллагъан Рэнди Браун­ сизин дивизионда лап да бийик спортчу десе де ярай. Шондан бир тюрлю четимликлер тувулунмасмы?

– Магъа ондан да бийик спортчулар булан ябушма тюшген. Бир четимлик де болмас деп эсиме геле. Магъа гьали виза булангъы масъала болгъан чакъы тез чечилеген кюй тарыкъ.

– Сагъа 39 йыл битди, амма сен гьали де ябушасан.

– Аслусу – ругь. Гюч якъдан мен жагьил спортчулардан бир де къалышмайман. Мен оьзюме: «Муслим, сен къарт болдунг, сени еринг диванда», – деп айтмажакъман. Бугюн де оьзюмню 25-26 йыллыкъ чагъымда йимик гьис этемен.

– Сагъа гезикли ябушувунгда ва дагъы да болажакъларында уьстюнлюк­лер ёрайман.

– Савбол.

 

Руслан БАКИДОВ

 

Авторизация
*
*
Регистрация
*
*
*
Согласны с условиями сайта?
Генерация пароля