Талатгюн, апрель айны 25-нде, Дагъыстан Республиканы Халкъ Жыйыныны гезикли сессиясы болду. Бизин республиканы еттинчилей сайлангъан парламентини 22-нчи шо сессиясын ДР-ни Халкъ Жыйыныны Председатели Завур Аскендеров ачды ва юрютдю.

Оьзюню гюнлюк низамгъа гёре белгиленген 25 де масъалагъа къаралгъанча, бир башлап парламентни фракцияларыны ёлбашчыларына сёз берилди. КПРФ-ни фракциясыны ёлбашчысы Абдулвагьит Лабазанов эсгергени йимик, республиканы тав районларында туризм тармакъны оьсдюрювге айрыча тергев бермеге тюше. Ону пикрусуна гёре, эгер де шолай этилсе, тав районларда онгайлы яшав шартлар болдурувгъа болушлукъ да этилежек, олай да, къошум иш ерлер болдурувгъа, шону булан бирге бюджетге йиберилеген акъча маяланы бир къадар артдырмагъа имканлыкълар яратажакъ.

«Справедливая Россия» –За правду деген фракциягъа къуршалгъан депутат Сагьит Сагьитов оьзюню сёйлевюнде жамиятны ругь ва къылыкъ якъдан таман даражада тарбиялавну масъаласын арагъа чыгъарды. Шону булан бирге, бизин уьлкеге тыш пачалыкъланы янындан тувулунагъан къоркъунч­лукъланы алдында бирлешмеге тюшегени, савлай уьлкеге ортакъ болагъан кюйде ругь ва къылыкъ якъдан мекенли къаравланы ташдырмагъа тюшегени гьакъда эсгерди.

«Единая Россия» деген фракцияны вакили депутат Руслан Ибрагьимов школаларда ва яшлар бавларында тийишли билимлери булангъы медицина касбучулар етишмейгени гьакъда айтды. Тез арада чечмеге тюшеген масъалаланы арагъа чыгъара туруп, буссагьатгъы вакътиде 1403 школадан янгыз 327-синде тюгюл медицина къуллукъчулар иш гёрмейгенин малим эте туруп, ол охув ожакъларда ишлейген медицина къуллукъчулар учун республика бюджетден таман чакъы акъча маялар гёрсетмекни таклиф этди.

Шондан сонг ДР-ни Сайлав комиссияны къарарына гёре, депутат Мухтар Гьалалмагьамматов оьзюню борчларын кютювню болжалдан алда токътатагъаны гьакъда айтылды. Ону мандаты «Единая Россия» партияны члени Гьажимурат Османовгъа берилген. Шо гьакъда жы­йылгъанлагъа Халкъ Жы­йыныны мандат булан ва депутатланы къылыгъына байлавлу масъалалагъа къарайгъан комиссиясыны ёлбашчысы Ильяс Мамаев билдирди.

Сессияны ишин узата туруп, ДР-ни адамны ихтиярларын якълавгъа къарайгъан толу ихтиярлы вакили Жамал Алиевни сёзлерине гёре, гетген йылны ичинде адамны ихтиярларын якълавгъа къарайгъан вакилини атына язылгъан 1200 арза къабул этилген. Шоларда аслу гьалда ватандашланы яшавлукъ онгайлыкъларын болдурувгъа байлавлу ихтиярлары къыйыкъ-сытылагъаны гьакъда айтыла. Оьрде эсгерилеген чакъы арзаланы айрыча гьарисине гёре республика ва муниципал гьакимлик къурумларыны жаваплы къуллукъчулары булан бирче мекенли иш этилген.

Ол дагъы да оьзюню сёйлевюнде педагогланы ва медицина къуллукъ-чуланы айлыкъ алапалары тёбен даражада къалып тура­гъаны гьакъда айтды. Гьар тюрлю аврувланы алдын алмакъ учун яшлагъа чечек яздырывну масъаласына да жыйылгъанланы тергевюн бакъдырды. Депутатланы кёп санавдагъы соравларына да тындырыкълы жавап­лар да берди.

ДР-ни Халкъ Жыйыныны Председатели Завур Аскендеров адамны ихтиярларын якълавгъа къарай­гъан толу ихтиярлы вакили районлагъа, шагьарлагъа барып, ватандашлар булан ёлу­гъувлар оьтгеривню мердешге айландырмагъа тюшегенин тийишли гёрегенин билдирди. Ону пикрусуна гёре, ишни шолай салып юрютювню къайдасы муратгъа къыйышывлу гьаракатны асувлулугъун шайлы артдырмагъа да бола. Дагъыстанны парламентини ёлбашчысы адамны ихтиярларын якълавгъа къарайгъан толу ихтиярлы вакили булан бирликде депутатлар гележекде де иш юрютежегине бир де шеклик этмейгени гьакъда да айтды.

Шондан сонг депутатлар жинаятчылыкълары учун жавапгъа тартагъан республика къурумларыны ишин, сакъатланы, сакъат яшлары бар агьлюлени ихтиярларын якълавгъа байлавлу ва оьзге кёп тюрлю масъалаланы арагъа салып ойлашдылар.