Декабрь айны 5-нде Россияда волонтёрланы Гюню белгилене. Шо гюн «Дагестан» деген маълумат агентлигинде Дагъыстан Республиканы яшёрюмлени ишлерине къарайгъан министерликни студентлени ва чалышагъан яшёрюмлени бёлюгюню къуллукъчусу Илгар Лелаев журналистлер булан ёлугъув оьтгерди.

И. Лелаев эсгерген кюйде бугюнлерде бизин республикада волонтёр гьисапда гьисапгъа алынгъанланы санаву 62 мингден де артыкъ.

«Айрокъда пандемияны ва хас дав гьаракатны вакътисинде гёнгюллю кюйде кёмек этмеге гьазир яшёрюмлени санаву артды Къайда кёмек тарыкъ буса, яшёрюмлер шоссагьат кёмек этмеге гьазир. Пандемияны вакътсинде республикада «Биз бирчебиз» деген ат булан къурулгъан волонтёр гьаракатгъа 4 минг адам къуршалгъан эди. Шолар гьали хас дав гьаракат гёнгюллю кюйде ортакъчылыкъ этеген адамланы агьлюлерине де кёмек этив ишлеге къуршалгъан. Оланы кёмеклиги булан хас дав гьаракат ортакъчылыкъ этегенлеге де ара бёлмей гуманитар маллар йибериле»,–деди оьзюню сёйлевюнде И. Лелаев.

Ону айтывуна гёре гьар сюйген адам волёнтер гьисапда гёнгюллю ишлеге къуршалмагъа бола. ДОБРО.РУ деген сайтгъа гирип гьисапгъа алынып сайтда ерлешдирилген чаралар да волонтер гьисапда гьар ким де оьзюню къолундан гелеген кёмекни этмеге, шолай да оьзюню сиптеси булан чара оьтгермеге имканлыкъ бериле.

Бугюнлерде волонтёр бёлюклер гьар районда, шагьарда ерлерде школларда, коллежлерде ва оьр охув ожакъларда бар. Оланы кёмеклиги булан кёп санавда пайдалы ишлер оьтгериле.