Апрель айны ахырында Дагъыстанда «Эсделикни вахтасы» ачылды. Шо гьаракат Уллу Уьстюнлюкню 78 ва Кавказдагъы дав битгенликни 80 йыллыгъына багъышлангъан.

Эки де агьвалатгъа багъышлангъан жыйын шагьарны баш майданында башланды. Сонг жаваплы къуллукъдагъылар, яшёрюмлер, охувчу яшлар, студентлер, дав агьвалатланы ортакъчылары, жамият къурумланы вакиллери гюллери-байракълары булан уллу орамдан юрюп, жыйынны къалгъан янын Ленинчи комсомолну атындагъы «Ватанны якълавчусуну» эсделигини янында давам этилди.

Гьаракатда ортакъчылыкъ этген Дагъыстанны Гьукуматыны Предсе-датели Абдулмуслим Абдулмуслимов:

– Савлай Россияда оьтгерилеген шу гьаракатда 40 мингден де артыкъ ахтарывчу ортакъчылыкъ эте, – деди. – Шу гьаракат яшёрюмлени бирлигин болдура, оланы патриот ругьда тарбиялама кёмек эте, давда оьлгенлерибизни атларын эсгерип чаралар оьтгере. Патриот ругьубуз – гележегибизни кюрчюсю, шо кюрчюню салывда бугюнлерде дазу бойларыбызны якълап уланларыбыз да ортакъчылыкъ эте. Биз олар булан оьктембиз.

Ондан сонг сёйлеген давну ва загьматны, асгер ва ихтиярланы якълав къурумларыны ветеранларыны Бютюнроссия жамият къурумуну Дагъыстан бёлюгюню председатели Магьарам Алижанов, хас асгер гьаракатны ортакъчысы Зиявутдин Абдуллаев, ТОКС-ну ортакъчысы Арслан Кагьруманов ва башгъалары жанынкъанын аямай, Уллу Уьстюнлюкню гелтирген уллаталарыны ва оланы аталарыны эсделигин сакъламакъ учун булай гьаракатланы маънасы аслам экенни айтдылар.

Жыйынны ахырында жыйылгъанлар Игитлени бульварына гюллер салдылар.