Минг яшасын къумукъ халкъ,
Досгъа дослукъ этеген.
Инамлы къурдаш болуп
Гьар намусну кютеген!

21-нчи февральда ана тиллени халкъара гюню оьтгериле. Шо гюнню гёз алгъа тутуп, алданокъ бары да къумукъ халкъны байрам булан къутламагъа сюемен.

Йылны экинчи айына гелеген шу байрамны бары да школаларда оьтгере. Тилни масъалалары булан бирге, маданиятны ва адабиятны гьакъында айтыла. Дюньяда яшайгъан гьар миллетни оьз тили, языву, тарихи, адатлары, гийимлери, оьз маданияты ва адабияты бар. Къумукъ миллетде шоланы арасында айрыча ер тута. Ана тилибизни гьалы йылдан-йылгъа къыйын бола. Оьсюп гелеген яшёрюмлени тилине тынгласа, яртысындан къолайы орус сёзлер. Къумукъ тилни агьамиятлыгъы уьйден, ата-анадан баш ала.

Ата-ана яшгъа ана тилин сингдирме тюше, ана тилине бакъгъан сююв яшны къанында къайнама тюше деп эсиме геле. Тилибиз дёнсе, миллетни тас этмек бар. Гьар адамны оьз элине бакъгъан сюювю болмаса, савлай миллет акъсама бола. Шо саялы ожакъда ана тилде сёйлеме герек.

Къумукъ тилде чыгъагъан газетлеге, журналлагъа язылма тарыкъ. Яшланы ана тилге бакъгъгъан янашывундан ана тилни билегенинден савлай халкъыбызны, гележеги гьасил болажагъы белгили. Яшларда ана тилге бакъгъан сюювню гючлендирмек буса – уллуланы борчу.

Яшларда ана тилге байлавлу сююв сёнмежекге уллу умут этемен.

Амирбекова Маржанат Изамутдиновна,Тёбен Къазаныш 3 номерли мактапны муаллими