00:17
Министрни – районлагъа сапары
Бир нече йылны узагъында савлукъ сакълав тармакъгъа гиреген «Земский доктор» деген федерал программа аста-аста булан яшавгъа чыгъып гелегенин гьис этебиз. Айтагъаным, алдагъы гюнлерде Дагъыстанны савлукъ сакълав министри Татьяна Беляева Къаягент ва Къоркъмаскъала районлардагъы медицина идараланы иши булан таныш болгъан. Шо гюн Къаягент районгъа ишлемеге баргъан 26 медицина къуллукъчугъа «Земский доктор» деген программагъа гёре яшавлукъ уьй къурмагъа топуракъ алмакъ учун шагьатнамалар берилген. Шоланы Къаягент районну администрациясыны залында районну ёлбашчысы Магьаммат Элдерханов ва савлукъ сакълавну республика профсоюз къурумуну председатели Зумурут Бучаева шатлы жыйында тапшургъанлар.
Тюзю, гьукуматны янындан жагьил врачланы социал якъдан якълайгъанлыкъ оланы ишлемеге дагъыдан да иштагьландырагъандан къайры да, уьй масъалаларын чечмеге де кёмек эте.
Шо сапарында Т. Беляева Къаягент район больницаны ичинден айланып чыкъгъан. 2021-нчи йылда савлукъ сакълавну Янгыртыв программасына гёре, Къаягент район больницагъа 1 «Газель», 3 енгил санитар автомашин, бираз алларда да гьар ерге гьайдап алып барма болагъан фельдшер-акушер пункт ва врач амбулатория берилген.
Олай да, Гьапкъаягент юртда фельдшер-акушер пункт къурулуп, ишлеп тура. Дружба посёлокда оьзлени лабораториясы булангъы, аврувлар гюндюзлер ятмагъа болагъан зки къабатлы врач амбулатория ишленип битме аз къалгъан. Федерал программагъа гёре бу йыл Къаягент район больницаны терапия корпусун мекенли кюйде ярашдырып, 80 койкагъа ер этмеге гёз алгъа тутуп, плангъа да гирген. Министр, вакцина этеген кабинетни де ва жамиятны савлугъун медицина къаравдан нечик оьтгерегенин де тергеген ва ишин яхшылашдырмакъ учун не этмеге герекни гьакъында пикрусун айтып, насигьатлар берген.
Шондан сонг Татьяна Беляева Къоркъмаскъала район больницаны иши булан да таныш болгъан. Онда да Янгыртыв программагъа гёре, биринчи амбулаториягъа кёмек этмек учун 5 машин берилген. Сонг да, ол Тёбе посёлокдагъы ва Учгент юртдагъы амбулаториялагъа тындырыкълы кюйде ремонтлар да этип, медицина ясандырывлар булан онгарылажагъын да белгилеген.
Дагъыстанны савлукъ сакълав министрини тапшуруву булан Къоркъмаскъала районгъа жамиятны флюографиядан чыгъармагъа аппарат токъташдырылажакъ. Шо ёлугъувда савлукъ сакълав министрни участка терапевтлер булан COVID-19 булан авругъан адамланы ерине етишдирип, медицина къаравлардан чыгъармагъа ва вакцина этмеге герекни гьакъында да лакъыры болгъан.
П. ГЬАЙБУЛЛАЕВА.
СУРАТДА: Къаягент районда врачлагъа шагьатнамалар тапшурагъан вакъти.
Паху Хайбуллаева
20 сент. в 09:33