Декабр айны 7-нде «Дагестанская правда» газетни редакциясында Дагъыстан Республиканы къурулуш, артитектура ва яшавлукъ-коммунал хозяйство министрини заместители Александр Нестеров прес-конференция оьтгерди.

Прес-конференцияда лакъыр аслу гьалда «Яшавлукъ уьй ва шагьарлы шартлар» деген милли проектге гиреген «Онгайлы шагьарлы шартлар яратыв" деген федерал программаны Дагъыстанда нечик яшавгъа чыгъарылгъанны гьакъында юрюлдю.

А. Нестеровну айтывуна гёре, эсгерилген программагъа гёре бугюнлеге ерли Дагъыстанны гьар тюрлю шагьарларында 115 жамият ерлер ва 49 абзар ягъалар онгарылгъан. Мисал учун Хасавюртдагъы парк янгыртылгъан. Каспийск, Къызылюрт, Кызлар шагьарларда жамият ерлерде ярашдырыв ишлер этилген. Магьачкъала шагьарда буса Жумамежитни янындагъы гиччирек бав, Акъкёлню ягъасы ва башгъа адамлар ял алагъан ерлер онгарылгъан.

2021-нчи йылда гиччи шагьарланы арасында 1-ерни алгъан Буйнакск шагьарда эсгерилген программаны асувлугъу булан шагьар бав онгарылгъандан къайры, бавгъа элтеген Ленинни атындагъы орамда да ярашдырыв ишлер тамамлангъан.

"Онгайлы шагьарлы шартлар яратыв" деген программада ортакъчылыкъ этмек учун юртларда, шагьарларда яшайгъан адамланы санаву 1 мингден аз болмагъа тюшмей.

Ярашдырыв ва янгыртыв ишлер этмеге герек ерлени буса оьзлени ватандашланы гьаракатчылыгъы булан сайламагъа ихтияр бериле. Демек онлайн тавуш беривню кёмеклиги булан ярашдырыв ва онгарыв ишлер этилмеге герекли ерлер токъташдырыла.

Онлайн тавуш беривде бу йыл 100 минг дагъыстанлы ортакъчылыкъ этген. Шону натижасында гелеген йылда эсгерилген программагъа гёре 37 жамият ерлерде янгыртыв ва ярашдырв ишлер этилежек»,–деди А. Нестеров.