Сурсат аманлыкъгъа тергев къолайлаша

 

 

Гьали тюгюл, къачанда да бизин уьлкебизде халкъны ва пачалыкъны сурсат аманлыгъын болдурувгъа айрыча тергев берилип гелгени белгили. Буса да, айлана якъдагъы Европа пачалыкълар булан башына тюшюп Американы Бирлешген Штатлары билдирген экономика четимликлени шартларында сурсат аманлыкъ бугюнню аслу масъаласы болуп токътай.

 

Халкъны савлугъу – пачалыкъны байлыгъы. Бизин савлугъубуз ва аманлыгъыбыз буса ашайгъан сурсатыбызны оьлчевлери ва сан яны булан тувра байлавлу. Бугюнлерде Магьачкъалада Дагъыс­тан пачалыкъ халкъ хозяйство университетиде оьтгерилген сурсат аманлыкъны гьакъындагъы сессиясы да шолай агьамиятлы масъалагъа багъыш­лангъан эди. Сессияда ортакъчылыкъ этгенлер бир башлап Дагъыс­танны Гьукуматыны Председатели этген аслу докладгъа тынгладылар.

– Сессияны ортакъчыларындан бугюн мен арагъа салынгъан лап да агьамитялы масъалагъа гёре лайыкълы пикрулар булан пайдалы таклифлер де къаравуллайман, – деп башлады оьзюню сёзюн Абдулмуслим Абдулмуслимов. – Россияны къыбла боюнда ерлешген Дагъыстан аграр респуб­лика гьисапда танывлу. Дагъысын айтмагъанда, республиканы агропромышленный комплексинде умуми регион продуктну бешден бир пайы болдурула. Шо да ич ва тыш талаплар учун асувлу кюйде пайдаландырыла демеге ярай. Юзюм, къой эт, чалтик, емишлер, овощлар оьсдюрювде ва болдурувда натижалар йылдан-йылгъа артып тербей. Бу йыл 1,5 миллион тон авлакъ ниъматлар, 282 минг тон юзюм, 235 тон емишлер ва шолай да 150 минг тон  чалтик оьс­дюрюлгени гьакъда рази­лик булан айрыча эсгермеге сюер эдим. Озокъда, етишилген натижалар бизин учун дазу тюгюл. Гележекде  уьстде эсгерилген тармакълар булан янаша къушчулукъну ва балыкъчылыкъны оьсдюрювге де айрыча тергев берилежек. Шону учун пачалыкъны янындан кёмекге берилеген субсидияланы да асувлу кюйде къолламагъа ва айлана якъдагъы къоллавчуланы талапларын толу кюйде яшавгъа чыгъармакъ учун гьаракатны артдырмагъа тюшежек.

Сурсат аманлыкъ учун юрюлеген гьаракатда дагъы да не йимик алдынлы къайдаланы, онгайлыкъланы ва имканлыкъланы къолламагъа тюше деген сорав тувулунду. Шо соравгъа байлавлу болуп сессияда дёртге бёлюнюп овощчулукъну, къушчулукъну, балыкъчылыкъны ва ишлетив промышленностуну масъалаларына байлавлу гьакълашыв, пик­ру алышдырыв да оьтгерилди.

Овощлар оьсдюрювге байлавлу «дёгерек столну» юрютген ДР-ни юрт хозяйство ва сурсат министрини биринчи замес­тители, эсгерилген охув ожакъны дарс беривчюсю, экономика илмуланы доктору Шарип Шарипов сессияны ишини гьасиллерине байлавлу пикруларын республикабызны маълумат къуралларыны къуллукъчуларына да ахырында аян этди.

– Юрт хозяйствода бары да тармакълар бир-бири булан тыгъыс кюйде байланып амалгъа геле, – деди ол. – Муна шо саялы да, гележекде илмуну сынав булангъы байлавлугъун беклешдиривде оьр даражалы касбучуланы гьазирлевге айрыча тергев бермесек бажарылмай. Неге десегиз, агропромышленный тармакъда ишлейген касбучуланы билим даражасына гёре натижалар, тюшюмлер ва алынагъан хайыр да гьасил болагъаны гьакъ. Шону учун  бизге гележекде багьалар артагъаны саялы къоллавчуланы янындан къыставуллу гьаллар тувмасын деген мурат булан оьсдюрюлген ва къайтарылгъан юрт хозяйство продукцияны ишлетеген, сакълавгъа салагъан ерлени къурувдан да хантав къалмагъа ярамайгъаны англашыла.

Сессияны ахырында арагъа салынгъан масъалалагъа байлавлу берилген пайдалы таклифлер гьисапгъа алынып, хас къарар къабул этилинди.

 

Къ. КЪАРАЕВ.

СУРАТДА: Абдулмуслим Абдулмуслимов ва Шарип Шарипов маълумат къуралланы вакиллерине жаваплар бере.

 

Авторизация
*
*
Регистрация
*
*
*
Согласны с условиями сайта?
Генерация пароля