«Бирикген Россия» В.Путинни якълады

 

 

17-нчи декабрде Москвада «Бирикген Россия» партияны 21-нчи съезди оьтгерилди. Шонда уьлкени бары да регионларындан гелген ва ортакъчылыкъ этген 1000 адам Россияны Президентине оьзюню кандидатурасын салгъан Владимир Путинни бир гёнгюлден якълады. 

 

Шонда сёйлей туруп, В.Путин уьлкеде четимлик­лени  бирге енгип, дагъы да оьрлюклеге етишмек учун кёп иш этме герекни айтды.

– Алдыбызда кёп уллу масъалалар токътагъан, шоланы кютмек учун бизге дагъы да бек бирикме тарыкъ, – дей В.Путин. – Шо яндан алгъанда «Бирикген Россия» партияны айланасында бары да миллетлени ва касбуланы вакиллери жыйылгъан. Оьзге пачалыкълардан харлысыз яшамакъ ва аманлыгъыбызны болдурмакъ учун бизге инг сыйлы байлыкъларыбызны сакълама, яшавлукъ ва агьлю гьалларыбызны яхшылашдырма герек. Шолардан уьлкебизни къысматы гьасил бола.

Президент уллулардан яшлагъа ерли биз харлысыз, оьзюбюз оьзюбюзню сакълап болагъан пачалыкъ къурмакъ учун бары да гьаракат болдурула­гъанны билме герекни де айтды.

– Къыйын заманлар, санкциялар булан айланадагъы пачалыкълар бизин бузуп дам-дагъырыбызны чыгъарма къарай эди, бажарылмады, уьстевюне, бизин экономика гючленди ва алгъа гетди, – дей Президент.

Янгы къошулгъан рес­публикаланы халкъларыны аманлыгъын сакълап, юрюлеген хас асгер гьаракат да уьлкени гючюн ва рагьмусун гёрсете, шоларда яшайгъанланы террорчулукъдан къоруй.

–Алдыбыздагъы масъалалар къар холадай оьсе, – дей Президент, – тек бизин халкъыбыз къыйын­лыкъланы кюте туруп гелген.

Съездде 12 адам булан бирге Дагъыстанны Башчысы Сергей Меликов да ортакъчылыкъ этген.

Дагъыстанны Халкъ Жыйыныны председатели Завур Аскендеров Президентни сёйлевюнден сонг оьзюню оюн айтды.

– Президентге кандидатурасын салгъан В.Путинни янгыз «Бирикген Россия» якълап къоймады, шогъар башгъа партиялар да къошулду, демек, биригив съездде башланды, – дей З.Аскендеров.

– Уьлкени башчысы айтгъан сёзлени гьарисини уллу маънасы бар.

Россияны Президентин сайлав 2024-нчю йылда 15–17-нчи мартда оьтгерилежекни де эсигизге салма сюебиз.

 

Бизин маълумат.

 

Авторизация
*
*
Регистрация
*
*
*
Согласны с условиями сайта?
Генерация пароля