Темирлан Абуталимов – Россияны Игити!

 

 

Къумукъ улангъа Игит ат берилген деген шат хабар янгыз бизин миллетни тюгюл, сав Дагъыстанны халкъын сююндюрдю. Бизин уьлкеге янгы къошулгъан регионланы миллетчилерден ва террорчулардан азат этмек учунгъу хас асгер гьаракат юрюлегени  2 йылгъа ювукъ бола. Шо агьвалатларда дагъыстанлылар да ортакъчылыкъ эте.

 

Хас асгер гьаракат гьали де давам этиле. Минглер булангъы асгерчилер гьаракатны къыйынлы ёллары булан оьтелер. Дав майданда жанын берегенлер де бола, къыйын­лыкълар ва  пашманлыкълар-къайгъылар булан раслашма, аналаны, къатынланы ва гьаракатда ортакъчылыкъ этегенлени авлетлерини гёзьяшларын гёрме де болабыз. Тек уланланы игитлиги, къоччакълыгъы ва Ватангъа берген антына амин болуп турагъаны юрегибизни оьр эте.

Дагъыстанны Башчысы Сергей Меликов оьзюню бир сёйлевюнде, бизден гетген уланлар дав майданда гёрсетеген къоччакълыгъы гьакъда айта туруп, олар мингден де артыкъ савгъат алгъанны эсгерди.

Темирланны Игит аты булан къутлай туруп Сергей Меликов булай сёзлени айтды:

«Ол башгъа дагъыс­танлы уланлар йимик ал сыдраларда да болуп, къоччакълыкъ ва игитлик гёрсетди. Яраларына да къарамай, дав майданны ташламагъан, оьзлерден гючю кёп керенге артыкъ миллетчилер булан къаршы тургъан ва шоланы асгер бёлюгюн дагъытгъан. Темирлан Дагъыстанны сегизинчи Игити болду.

Гьюрметли Темирлан, Дагъыстан сени булан оьк­тем ва гьайран бола. Сен герти дагъыстан хасиятны гёрсетгенсен, къаттылыкъны ва намус – борчну уьлгюсю болуп токъта­гъансан. Сен Ватанны сюегенинг ва оьзюнгню игитлигинг булан элибизни гючюн де гёрсетмеге ва атын оьр этме бажаргъанынг учун баракалла!».

Темирлан Умарович Абуталимов 1997-нчи йылда Темиравулда тувгъан. 11-нчи класны Магьачкъаладагъы 17-нчи гимназияда битдирген ва Дагъыстан пачалыкъ университетни юридический факультетине тюшген.

–Темирлан гиччиден тутуп гьаракатчы яш эди, – дей, мени булан сёйлей туруп, Игитни агъасы Нариман. –Гимназиядан, сонг университетдеги йылларында ол тайский боксгъа юрюй эди. Шагьардагъы ва федерал округдагъы ярышларда ортакъчылыкъ этип, савгъатлы ерлер алып турду. Кёп медаллары да бар. Тренери Анварбек Амиржанов бираз къаст этсе, дагъы да даражасы артыкъ ярышларда ортакъчылыкъ этме болагъанын айтып да турду, тек ол бары да тергевюн охувгъа бакъдырды.

2019-нчу йылда Темирлан университетни охуп битдире ва асгерге чакъы­рыла. Брянск шагьарны боюндагъы мотострелковый асгерде къуллукъ этип къайтгъанда иш тапмакъны къайгъысын эте. Ич ишлени министри А.Магьамматов шо йылларда оьзлени сыдраларына яш касбучуланы чакъырагъан замангъа къаршы бола. Темирлан конкурс­дан оьте ва Хасавюртдагъы шагьарны ич ишлер бёлюгюне ахтарывчу (следователь) этип йибериле.

– Украина бойда хас асгер гьаракат башлангъанда, бизин арабызда лакъырлар юрюле эди, — деп давам эте Нариман. – Анама да, магъа да айтмай мобилизация башлангъанда асгерге гетип къалды. Шонда бара турагъанын да гете турагъанда билдик.

Ону мотострелковый бёлюкге йибере. Аз заманны ичинде огъар сержант чин бериле ва взводну командирини орунбасары этип белгилене. Яшланы гранотамётдан атышма уьйрете, дав агьвалатларда шо савутдан уруп, миллетчилени техникасын да буза.  Ону гьаракатын ушатып ротаны командири Евгений Груздиев огъар лейтенант чин бермекни талап эте. Взводну командири гьисапда Темирлан бир нече урушларда ортакъчылыкъ эте. Гёрсетген игитлиги учун Къоччакълыкъны ордени булан савгъатлана.

Шолай бир давда ротаны командири оьле. Сёз ёругъуна гёре айтсакъ, оьлгенден сонг Е. Груздиевге Россияны Игити деген ат да бериле.

Ротаны лейтенант Темирлан Абуталимовгъа тапшура. Бу йыл июн айны ортасында Запорожьени айланысында кёп къатты урушлар бола, ротаны да шо бойгъа сала. Ротаны алдында чапгъынгъа тюшген Темирлангъа биринчи яра тие. Тек ол ярасына да къарамай, гранатомётдан уруп туврасындагъы 2 гюбели техниканы яллата. Сонг гюч болуп турагъан ротагъа кёмекге алгъасай. Шонда да бирдагъы 2 техниканы яллата ва пулемётдан уруп, 20-гъа ювукъ миллетчилени де къыра. Оьзю­ню ярасына къарамай, гьалы битгенче яралы ёлдашларына кёмеклешип де тургъан.

Шо къоччакълыгъы учун Темирлан Абуталимовну Игит атгъа гёрсетген.

Шо савгъатны Россияны Президенти В.Путин Кремльни къаласында тапшурду.

Биз де къумукъ уланыбызны, ону тарбиялагъан анасы Мадинаны гьакъ юрекден къутлайбыз. Дав гьаракатлар да битип, сав-саламат уьюне де къайтып, агьлю де къуруп, парахатлыкъда яшамакъны ёрайбыз!

 

Гебек КЪОНАКЪБИЕВ.

 

Авторизация
*
*
Регистрация
*
*
*
Согласны с условиями сайта?
Генерация пароля