Гьали-гьалилерде Магьачкъалада М. М. Жамболатовну атындагъы Дагъыстан пачалыкъ аграр университетде (ДГАУ) халкъара оьлчевюндеги илму-сынав конференция оьтгерилди. Аграр тармакъда чалышагъан алимлени жыйынында «Сурсат аманлыкъны болдурувда янгы къайдаланы къоллав ва ашамлыкъ малланы сан яны» деген аслу масъаланы айланасында генг кюйде гьакълашыв, пикру алышдырыв юрюлдю.

Прес-конференцияны ачгъан ва юрютген эсгерилген оьр охув ожакъны ректору Зайдин Жамболатов жыйынны ортакъчыларына натижалы иш ёрады. Сурсат аманлыкъны болдурувда гьалиги заманда алимлени алдында не йимик масъалалар токътагъаны гьакъда баян этди.

– Бир башлап мен прес-конференцияны оьтгеривде айрыча гьаракат этген бизин охув ожакъны технология факультетини профессору Мусашейх Салмановгъа айрыча разилигимни билдирмеге сюер эдим, – дей туруп узатды оьзюню сёйлевюн Зайдин Магьамматович. – Гюнлюк низамгъа салынгъан агьамиятлы масъалагъа байлавлу айтсакъ, озокъда, сурсат аманлыкъны болдурувда Россияны аграр республикаларыны арасында Дагъыстан да оьз янындан лайыкълы къошум этегени гьакъ. Къоллавчуланы талап­лары артгъан сайын, бугюнлерде юрт хозяйство продукцияны сан яны да къолайлашагъанын айрыча эсгермеге тюше.

Мердешли юрт хозяйство тармакъда чалышагъан алимлеге де сыйлы борчларына жаваплы кюйде янашмагъа тюше. Айтмагъа сюегеним, билимли ва англавлары терен касбучуланы гьазирлемеге герекбиз. Муна шо саялы да, биз жыйынны ортакъчыларындан бугюн сурсат аманлыкъ учун юрюлеген гьаракатны бошама къоймайлы, пайдалы таклифлер бермеге борчлубуз.

Арагъа салынгъан агьамиятлы масъалагъа гёре болгъан сёйлевлени арасында илму-янгылыкъ управлениени начальниги, ДГАУ-ну проректору, юрт хозяйство илмуланы доктору, профессор Татьяна Исригова, ДР-ни юрт хозяйство министерлигини къоллавчуланы сурсат базарларыны ва юрт хозяйство продукцияны ишлетив управлениесини начальниги Магьаммат Патагьов, Роспортребнадзорну Дагъыстандагъы къуллугъуну ашамлыкъ малланы сан янына къарайгъан бёлюгюню начальниги ва оьзгелери арагъа салынгъан агьамиятлы масъалагъа гёре асувлу таклифлерин де аян этди.
Жыйынны ахырында Мусашейх Салманов да аграр тармакъда чалышагъан алимлеге берген таклифлери саялы баракалласын билдирди. Ашамлыкъ промышленностну оьсдюрювде айлана якъдагъы талапланы гьисапгъа алып иш гёрмеге тюшегени гьакъда айрыча эсгерди. Неге десегиз, сурсат аманлыкъны болдурув – пачалыкъ агьамияты булангъы жаваплы масъала.