Биринчи ерни къазанма сюегенлер кёп эди. Неге тюгюл де, олагъа барына да Россияны чемпионатына ёл ачыла. Уллуланы арасында Дагъыстанны чемпиону болгъанлар март айда Каспийск шагьарда оьтгерилежек Россияны кубогуну ярышларында ортакъчылыкъ этежек. Яшланы ва оьрюм яшланы арасында биринчи ерлени алгъанлар Россияны чемпионатына баражакълар. Ону учун уьч гюнню узагъында ринглерде бек гючлю ябушувлар болду.

Яшланы арасында 44 кило авурлукъда къарланюртлу Магьамматхан Залимханов избербашлы тай боксёр Алибековну финалда утуп, биринчи ерни алды. Ол гьали Дагъыстанны дёрт керен чемпиону болду. Къыбла ва Темиркъазыкъ-Кавказ федерал округланы чемпиону. Россияны чемпионатында экинчи савгъатны да утгъан. Мычыгъыш Респуб­ликаны ва Краснодар крайны чемпиону да дюр.

Хасавюртлу 15 йыллыкъ Вазирхан Умаев («Ботаюрт» спорт школа) 52 килода, Кёстек юртлулар Анжи Акъавов 56 килода, Айтбер Амиржанов 63 килода биринчи ерлени алдылар.

Уллуланы арасында чемпион атгъа 71 килода Ислам Муртазаев («Ботаюрт» спорт школа, тренери Алибий Казиев) ва Магьачкъаладагъы Ж. Къасумовну атындагъы спорт клубдан 75 килода Гьажимурат Амиржанов (тренери Амирбек Амиржанов) ес болдулар.

Кёстек юртлулар Муратхан Гьажиакъавов 46 килода, Ибрагьим Гьажиакъавов 54 килода ва 60 килода «Ботаюрт» спорт школадан Зулумхан Алыпкъачев экинчи савгъатланы къазандылар.


Суратда: В. Умаев.
Автор чыгъаргъан сурат.