Дагъыстанны Башчысы Сергей Меликов оьзюню «тувра эфи-ринден» сонг гьар къурум, шолай да район ва шагьар админист-рацияланы башчылары шулай къайдада адамланы соравларына жаваплар берме герек деп чакъыргъан эди. 9-нчу декабрде адамланы соравларына жаваплар Дагъыстанны билим берив ва илму министри Ягьия Бучаев берди. Министр булангъы байлавлукъгъа 52 ерден управлениелени ёлбашчылары, муаллимлер, яшлар бавларыны ёлбаш-чылары ва школаланы ата-ана комитетлерини вакиллери чыкъды.
Министр булан байлавлукъгъа ким сюйсе чыгъып бола эди. Тувра эфирге зенг этип, яшавлукъ сетлерден ва телефондан, Ахты райондан башлап, Ногъай районгъа ерли соравлар берилип турулду.
Магьачкъаладан школаларда муаллимлер етишмейгенни гьакъындагъы соравгъа, билим беривню янгы къайдалары ойлашынып турагъанны ва школаларда, коллежлерде охувчуланы тергевюн педагогикагъа бакъдырмакъ учунгъу чаралар гёрюлежекни айтды. Министерликни къасты булан школаларда педагогика класлар ачылажакъ, шоларда яшлар тюрлю-тюрлю муаллим касбуланы уьйренме болажакъ.
Хасавюртдан охув китаплар етишмейгенни гьакъындагъы сорав гелди. Министр билдирген кюйде, бугюнлерде республикада 9,2 миллион китап етишмей ва шоланы алмагъа 7 миллиард манат тарыкъ. Гьалны бир ёрукъгъа салмакъ учун 2024-нчю йылда республиканы школаларын Москвадагъы электрон школагъа къошма хыял этиле ва гьар яш шондан таба тарыкъ китапланы охума болажакъ.
Бирдагъы сорав бир-бир ата-аналар яшларын яшлар бавгъа язагъанны, тек йибермейгенни гьакъында эди. Олар ерни тутгъан, тек ери бош. Ягьия Бучаев шолайлар булангъы дыгъарны бузуп, гезиги булан гелеген яшны алма болагъанны айтды.
Сулейман-Стальск райондан федерал программадан таба школаланы ярашдырыв къачан болгъанча давам этилежекни сорады. Ягьия Бучаев министерликде янгыртмакъ учун 168 школаны документлери къабул этилингенни айтды. Тек гелеген йылда — 6, 2025-нчи йылда -8 ва 2026-нчы йылгъа 24 школагъа харж гёрсетилгенни билдирди. Эгер де артыкъ харж берилсе, гезиги булан ярашдырма гёз алгъа тутулгъанны да эсгерди.
Магьачкъаладан гелген соравда школаланы ерли муниципалитетлерден тайдырып, республиканы табилигине алма герекни гьакъында айтылды. Министр шолай масъалагъа къарала, тек ерли муниципалитетлер школалагъа ювукъ ва талапларын тез чечме болагъанны айтды.
Шамилкъала посёлокдагъы школа яхшы бузулгъаны саялы ябулгъанны гьакъындагъы соравгъа жавап бере туруп, Ягьия Гьамитович шо масъала Дагъыстанны Башчысыны тергевюню тюбюнде экенни билдирди. Бугюн Дагъыстанда шолай 140 школа бар, шоланы янгыртма яда башгъаларын къурмакъ учун 40 миллиард манат тарыкъ. Тек плангъа гёре артдагъы йылларда кёп санавдагъы янгы школалар ачылып турагъаны гьакъда толу кюйде айтылды.
Шо гюн министрге 60 сорав берилди. Бары да соравлар язылып алынды. Шолар Дагъыстанны ва Гьукуматны башчыларына ва жаваплы министерликлеге етишдирилежекни айта туруп, Ягьия Бучаев республиканы муаллимлерин гелеген Янгы йыл булан къутлады, ишлеринде уьстюнлюк, савлукъ ва ожакъларында парахатлыкъ ёрады.
Бизин мухбирибиз.
