Бу йылны гюзю явунларсыз оьтсе де, декабр айны башындан тутуп ява.Чакъны четимликлерине де къарамайлы бугюнлерде республи-кабызда ягъарлыкъ-энергетика комплексини къышгъа гьазир этивге байлавлу ишлер арасы бёлюнмейген кюйде оьтгериле…
«Дагъыстан» деген республика маълумат агентлигинде дагъыстанлы къоллавчуланы къыйнайгъан агьамиятлы масъалагъа байлавлу болуп регионну журналистлерине ДР-ни энергетика министри Марат Шихалиев, «Дагэнерго» деген акционер жамиятны баш инженери Гьажи Гьажиев, Магьачкъаланы яшавлукъ коммунал хозяйство управлениесини башчысыны заместители Сайитгьюсейн Магьамматов ва шолай да оьзге жамият къурумланы вакиллери баянлыкъ берди.
– Дагъыстанны Башчысы Сергей Меликовну сиптечилиги булан арт вакътилерде республикабызны электрик хозяйствосун янгыртывгъа байлавлу ярашдырыв ишлер генг кюйде оьтгериле, – деди Марат Шихалиев. – Этилинген ишлер кёп, тек этилмеге герекли ишлер дагъы да артыкъ. Неге десегиз, республикабызны электрик хозяйстосуну 70-75 процентини къоллав болжаллары битген. Шону учун къошум гьисапда дагъы да 1,75 миллиард манатны харжламакъ учун чаралар гёрюле.
Прес-конференцияны барышында берилген кёп къадардагъы соравлагъа жаваплар къайтарылды.
Къ. КЪАЗАКЪМУРЗАЕВ.
