Республикабызны агропромышленный комплексини оьсюмлюк-чюлюк ва гьайванчылыкъ тармакъларында хайыргъа ишлемек учун сайламлы урлукъланы болдурувну ва жынслашдырыв ишлени камиллешдиривюню ёрукълашдырывдан кёп зат гьасил бола.

 

ДР-ни юрт хозяйство ва сурсат министерлигини прес-къуллугъу аян этеген кююнде, гьали-гьалилерде гьайванланы искусственный къайдада балагъа токътатыв булан машгъул болагъан касбучуланы республика конкурсу оьтгерилди. Конкурсда ДР-ни юрт хозяйство ва сурсат министрини заместители Эмин Шейхгьасанов, Магьачкъаладагъы федеральный-илму ахтарыв институтуну башчысы Нариман Ниматуллаев ва оьзге ёлдашлар ортакъчылыкъ этди.

– Жынслашдырыв ишлени камиллешдиривге артдагъы вакътилерде бизин регионда тергев артып тербей, – деди оьзюню къутлав сёйлевюнде Эмин Шейхгьасанов. – Гьали болгъунча шогъар байлавлу масъалаланы ёрукълашдырмакъ учун республикабызда айрыча хас пунктлар етишмей эди. Шону учун республика бюджетден тарыкълы къуралланы алып ерлешдирмеге 10 миллион манат харж гёрсетилинди. Айтмагъа сюегеним, узакъ къалмай Дагъыстанда гьайванланы ва малланы искусственный къайдада балагъа токътатмагъа имканлыкъ береген дагъы да 5 янгы пункт къурулуп пайдаландырывгъа берилежек. Бугюн буса магъа да конкурсну ортакъчыларын гёрмекли агьвалат булан къутлай туруп, олагъа конкурсда уьстюнлюклер ёрамакъ къала.

Агьамиятлы конкурсну ортакъчылары Къызылюрт райондагъы СПК-ны кюрчюсюнде гьариси бажарывлугъуна гёре оьзлени усталыгъын ташдырды.

Оьтгерилген конкурсда биринчи ерге эсгерилген юрт хозяйство производство кооперативни вакили Али Алиев ес болду. Алдынлы ерлеге ес болгъанлагъа багьалы савгъатлар ва дипломлар тапшурулду.

 

Къ. КЪАРАЕВ.

СУРАТДА: (солда) республика конкурсда биринчи ерге ес болгъан  Али Алиев.