Яш наслуну тарбиялавда, билим беривде охув ожакъланы уллу къошуму бар. Шогъар гёре де охув ожакъларда гьар тюрлю чаралагъа, тархлагъа байлавлу болуп студентлени къуршап белгили адамлар булан ёлугъувлар ва спорт ярышлар оьтгериле.

Алдагъы жумада Магьачкъаладагъы милли коллежде студентлени генерал-майор Шамил Асланов, «Возрождение» деген школаны директору, Дагъыстан Респуб­ликаны халкъ игити Магьамматгьабип Халитов, Герценни атындагъы «Россия пачалыкъ педагогика университетни Дагъыстандагъы филиалыны кафедрасыны заведующийи Магьаммат Уружев, ДР-ни муфтиятыны билим берив бёлюгюню ёлбашчысы Узайир Шамилов, ДР-ни билим берив ва илму министерлигини консультанты Нуриян Вагьаева, Магьачкъала шагьардагъы 59 номерли школаны директору, милли инновация коллежни кюрчюлендирген Ибрагьим Байсонгуров ва башгъалары булан ёлугъуву болду. Коллежде Космонавтиканы гюнюне багъышлангъан асгер-спорт ярышлар оьтгерилди. Коллежни студентлеринден къурулгъан 6 команда асгер-спорт ярышларда гьариси оьзлени гьюнерин гёрсетдилер.
Генерал-майор Шамил Асланов, Байсонгур Ибрагьимов ва башгъалары сёйледилер.

Милли инновация коллежни директору Гулияр-Ханым Аминова ярышланы ачды ва командалагъа уьстюнлюклер ёрады.
«Земля», «Ракета», «Галактика», «Спейс», «Спутник», «Меркурий» деген атлар берилген 6 да команда ювукъ мезгилге чабывда, противогазны ва къорув плащны гийивде чалтлыгъын гёрсетди. Ярышда ортакъчылыкъ этеген командалар, шолай да пневмат тапанча булан атышды, АК-74 М2 автоматны берилген болжалгъа гёре сан-санындан айырып, гене къайтып жыйдылар. Шондан къайры да, ярышдагъы тапшурувланы арасында «хатабалагьгъа» тарыгъан адамгъа биринчи кёмек этивде, гранат атывда ва спортда оьзлени бажарывлугъун гёрсетмеге имканлыкъ берилди.

Биринчи ер милли инновация коллежни «Сестринское дело» бёлюгюню «Спутник» деген командасы къазанды. 2-нчи ерге «Стоматология ва ортопедия» бёлюкню «Ракета» деген командасы, 3-нчю ерге буса «Дошкольное образование» бёлюкню «Меркурий» деген командалары ла­йыкълы болдулар.

Алдынлы ерлени алгъан командалагъа кубоклар, медаллар ва грамоталар тапшурулду. Бу ярышны гьазирлеген дарс беривчю Фёдор Астаев де грамота булан савгъатланды.
Гечге таба кёкде шавла яйгъан салютлар лансыллады. Шо гюн уллу да, яш да дегенлей оьтгерилген бары да агьвалатлардан леззет алды. Айрокъда студентлер гележекде дагъы да яхшы къаст этмеге, гьюнерлерин артдырмагъа ругьланды.