Октябр айны 26-сында Россия Федерациясыны экономика оьсювюню министри Максим Решетников бизин республикагъа гелген. Магьачкъаланы аэропортунда федерал министрни Дагъыстан Республиканы Башчысы Сергей Меликов къаршылагъан.

Аэропортда М. Решетников ва С. Меликов Дагъыстан Республиканы экономика оьсювюне байлавлу генгеш оьтгерген. Генгешде регионда социал ва инженер инфраструктура къурулушлар болдурувуна, «Темиркъазыкъ-Кавказ федерал округну оьсювю» деген РФ-ни пачалыкъ программасына, олай да республика программаланы яшавгъа чыгъарылывуну масъалаларына къаралгъан.

Генгешни тамамлап, министр ва республиканы Башчысы журналистлени соравларына жаваплар къайтаргъан. Сонг Максим Решетников Дербентге гетген. Ондагъы турист идараларда болгъан, артда да «Яраг-Казмаляр» деген автомобиль ёл дазудагъы пунктгъа баргъан.