Гьалиден элли йыллар алъякъда, айтагъаныкъ 20 йылланы узагъында къурулгъан ва къоллавчулар учун пайдаландырывгъа берилген Чиркей ГЭС-ни къурулушунда бютюн совет халкъ ортакъчылыкъ этди демеге ярай. Темиркъазыкъ Кавказда лап да уллу ГЭС гьисапда танывлу объектни сув гьавузу да айлана якъдагъы шагьарларда ва юртларда яшайгъан ватандашланы ичеген таза сув булан таъмин этмек муратда амалгъа гелегени гьакъда белгили.

 

Тек не этерсен, шо заман-шу заман гьали де айлана якъдагъы къоллавчуланы ичеген таза сувгъа бакъгъан якъдагъы талаплары толу кюйде яшавгъа чыгъарылмайгъанына къарап ичингбуша эди.

Гьечден геч де къолай деген кюйде, артдагъы йылларда бизин республикабызда «Таза сув» ва «Мени Дагъыстаным – мени сувларым» деген агьамиятлы федерал ва регион оьлчевдеги проектлер милли борч гьисапда яшавгъа чыгъарылагъаны гележек учун инамлыкъны тувдура.

РФ-ни Гьукуматыны Председателини яшавлукъ-коммунал масъалалагъа къарайгъан заместители Марат Хуснулин билдирген кюйде, Янгы йылны алдында Дагъыстанда «Чиркей-Буйнакск» деген ичеген сув юрюйген быргъы бутакъ пайдаландырывгъа берилди.

– Чиркейдеги сув гьавуздан алынгъан таза сув юрюйген бутакъны къуруп пайдаландырывгъа берив гележекде 70 мингден де кёп къоллавчуланы сувгъа бакъгъан якъдагъы талапларын толу кюйде яшавгъа чыгъармагъа имканлыкълар яратажакъ, – деди ол. – Шолайлыкъда, эсгерилген сув гьавуздан сутканы ичинде къоллавчулагъа 30 минг кубометрден де кёп ичеген таза сув гелтирилежек. Шо да – Янгы йылны алдында къоллавчулар учун лайыкълы савгъат.

Гертиден де, шагьарны халкъы шо яхшылыкъны хыйлы йылланы узагъында чыдамлыкъ этип къаравуллап тургъаны гьакъда Буйнакск шагьар округуну башчысы Исламутдин Нургьудаев де разилик булан эсгергени англашыла.

Озокъда, шо ишде ДР-ни Башчысы Сергей Меликовну да айрыча къошуму барлыгъы гьакъда эсгермей къойсакъ, дурус болмас. Чиркейден Буйнакск шагьаргъа ичеген таза сувну къоллавчулагъа  етишдирмек учун 16 миллиард манатдан къолай акъча харжлангъаны ва 32 чакъырым аралыкъгъа быргъылар салынгъаны да шону ачыкъдан ташдыра.

Бизге де, бу ерде Дагъыстанны шагьарларында ва юртларында яшайгъан ватандашланы артып тербейген талапларын тергевсюз къоймай гележекде де оланы ичеген таза сув булан таъмин этив ишлер узатылажагъына инанмакъ къала.

 

Къ. КЪАРАЕВ.