Жамболат САЛАВОВ,

Дагъыстанны транспорт ва ёл хозяйство министри.

 

Етишип гелеген Янгы йыл булан кёп миллетли Дагъыстанны халкъын гьакъ юрекден къутлайман ва бизин министерлик де адамланы яшавун яхшылашдырмакъ учун этген къошумуну гьакъында айтма сюемен.

2023-нчю йылда республика ва федерал бюджетден 17,6 миллиард манат харжлангъан 635,6 чакъырым ердеги ёллар ва 12 кёпюр ярашдырылды. 7,5 минг чакъырым ердеги республика ва районара ёлланы да ярашдырма имканлыкъ болду.

Гелеген йылгъа да алдыбызда уллу проектлер токътагъан. Шолардан инг де аслулары Магьачкъала, Дербент ва Хасавюрт шагьарланы айланып оьтеген ёлланы къурув башланажакъ. Шоланы къурмакъ учун Россия Федерацияны бюджетинден таман чакъы харж гёрсетилген.

Федерал ёллар булан янаша, темир ёлланы, аэропортда самолётлар учагъан портлагъа барагъан, гюмрюк бойдагъы ёлланы да янгыртма ва ишин яхшылашдырма гёз алгъа тутулгъан. Шолар барысы да адамланы онгайы учун этиле. Шолай борчну бизге Россияны Президенти В.Путин ва Дагъыстанны Башчысы Сергей Меликов салгъан.

Янгы йыл булан къутлай туруп, машин гьайдавчулагъа да ёл юрюшлени низамын бузмай, ожакълагъа къайгъы гелтирмей бир-биревден сююнюп ва къуванып яшамакъны ёрайман!