Оюнну алтынчы минутунда футбол майданны есилери, «Анжини» къапусундан отуз метрлер арекде штрафной къазанды. Оренбурглуланы составында ойнайгъан биргине-бир дагъыстанлы, оланы капитаны Камалудин Агьматов, Кержаковну къапусуна багъып топну бакъдырып, о да сыдыра болуп эретургъан бизин футболистлерибизни бирисини башына тийип, къангып бизин къапуну сол мююшюне гирди.

 Шо гол гийирилген мюгьлет болгъунча да, шо мюгьлетден сонг да, «Анжи» бары оюнну чапгъын эте туруп, «Газовик - Газпромну» къапусуну къырыйында йиберди. Бизин футболистлер «Газовикни» штрафноюна етгинче бары футбол майданны тынч кюйде оьте эди. Тек штрафнойгъа етген сонг, Оренбургну бары да футболистлерине урунуп, ишни дагъы алгъа йибермек учун кёп четимликге, пуршавлукъгъа къаршы бола эди. «Газовикни» буса, оюнну башындан тутуп ахырына ерли бизин команданы бирлешивюн бузмакъдан, оьзлени къапусуну алдында къоркъунчлу мюгьлет тувдурма чалышагъан «Анжиге» пуршав этмекден къайры, дагъы гьайы ёгъу савлай оюнну узагъында гёрюнюп турду.

Оюнну судьясы Игорь Низовцев экинчи таймда бир мюгьлетде оренбурглуланы къапусуна он бир метрлик пенальти салма борчлу эди. О гьакъда «Анжини» баш тренери Ташуев, оюн битгенде берген баянлыгъында бек къарсалап: «...Бизге башгъалагъа йимик судьяны кёмеги герекмей, бизге судья бар затны гёргени тарыкъ! Бир зат да болмагъан да йимик, тап-таза пенальтиге агьамият бермей къоягъан судьядан не ахтарасан?!» – деди.

– Ондан къайры, Оренбургдагъы стадионну есилери  футбол майдангъа салынгъан (яшыл от тюгюл) искусственный газонну оюн гьали башланды дегенде,  яхшы кюйде сугъара... Олай зат, не тренерлер, не футболистлер бир де эшитген, не де гёрген зат да тюгюл. Искусственный газонну сугъара дейген не затдыр!? Оьзю де оюнну башында, – деп къарсалады бирдагъы да Ташуев.

Шолайлыкъда, «Анжи», «Газовик–Газпромну» къапусуна он дёрт керен урма да уруп, азындан, беш-алты къоркъунч­лу мюгьлет де этип, гол гийирме бажармады.

Мен ойлашагъан кюйде, командагъа яхшы чапгъынчы етмей, аслу чапгъынчыбыз Шамил Асилдаров гьали де не буса да оьзюню чинк де яхшы оюнун гёрсетип болмай тура. Исламнур Абдуллавовгъа да, Сердер Сердеровгъа да буса, Ташуев ойлайгъан кюйде, сав токъсан минут футбол майданда ойнамагъа гьали де эрте.

Шу оюндан сонг «Газовик», он бир очко да къазанып, турнир таблицаны башында ерлешди, «Анжи» буса он очко булан экинчи ерге ес болду.

Шарапутдин КИШИЕВ.