25-нчи апрелде Дагъыстанны Башчысы Сергей Меликовну ёлбашчылыгъы булан экономиканы беклешдиривге ва оьсювюн болдурувгъа багъышлангъан генгеш оьтгерилди. Сёйлевюню башында ол экологиягъа, туризмге, Каспий денгизни боюн онгарывгъа, милли проектлени яшавгъа чыгъарывгъа тергев бермекни айтды.

– Дагъыстан, Россияны халкъара транспорт юрюйген ва Россиягъа, Европагъа, Индиядан, Ирандан, Сауд-Арабыстанны пачалыкъларындан тарыкъ мал гелтирилеген аслу ёл болуп токътай. Шо гьакъда биз оьтген жумада гелген Россияны Гьукуматыны Председателини заместители Александр Новак булан да лакъыр этдик. Ол айтагъан кюйде, гележекде Дагъыстанда «Темиркъазыкъ-Къыбла» деген транспорт аралыкъ къурулма имканлы, – дей Сергей Меликов. – Шону булан бирге аэропортну ва денгиз порт­ну да янгыртмакъ гёз алгъа тутулгъан. Шону учун биз оьзюбюзню экономикабызны оьсювюню гьайын этме ва шону яшавгъа чыгъармакъ учун къарарлар да чыгъарма герекбиз.

С. Меликов айтагъан кюйде, биринчилей, ишлейген къурумлагъа налогларын енг­иллешдиреген закон къабул этилежек. Шо закон булан уллу юклер ташыйгъан машинлеге тёлейген гьакъ да аз болажакъ.

Россияны Гьукуматы топуракъны ишлетегенлеге де кёмек болдуражакъ: ашлыкъ болдурагъанлагъа бермеге деп 10 миллиард манат гёрсетилген. Оьтген айда юрт хозяйствода ишлейгенлеге 30 миллиард енгил кредитлер берилген, сонг дагъы да 150 миллиард манат къошум харж этилежек.

Промышленностда башлангъан ишлерин тамамламагъа ва оьсдюрювюн болдурмакъ учун Дагъыстангъа 4,3 миллиард манат гёрсетилген. Шондан 14 миллиону берилип де битген. Шо харжгъа къурумлар ишчилерин сакълама да, къалгъан ишлерин бир ёрукъгъа салып да болажакъ.

Ашамлыкъ малланы алгъанда, шо якъдан Дагъыс­танда къытлыкъ ёкъ. Дагъыс­танны Башчысы ерлерде ишлейген далапчылагъа да якълав чаралар гёрме герекни гьакъында айтды. Школаларда берилеген исси ашланы да шолар болдургъан маллардан этме герек. Дагъыстанда болдурулагъан ашамлыкъ маллар дарманлардан да таза ва пайдалы.

Шолай да, уьйлеринде мебель этип ишлейгенлени маллары Дагъыстангъа тышдан гелтирилеген маллардан кем тюгюл. Шоланы ишине де пуршавлукъ этме ярамай.

Артдагъы къысаслыкъ билдиривню натижасында Дагъыстанда 4 минг адам ишсиз къалмакълыкъ бар, шону учун да гёрсетилген харждан шоланы иш булан таъмин этив чаралагъа ва башгъа касбу алыв учун охутмагъа харжлама болажакъ.

Яшлар бавланы ярашдырмакъ ва янгыларын къурмакъ учун да Россияны Гьукуматы 300 миллион манат гёрсетген, къурувчулагъа шо акъчаны кепегине ерли харжламагъа, тергевню юрютмеге буса прокуратурагъа тапшурду.

Дагъыстанда экономиканы оьсдюрмек учун бары да имканлыкълар бар, Россияны Гьукуматы этеген кёмек де ишни ёрукълашдырма имканлыкъ бере.

Янгыз юрт хозяйствону алып къойсакъ да, эсгерилген ишлени кютмек учун юрт хозяйство техника да, адамланы ишин енгиллешдиреген машинлер де болма герек, шоланы алмакъ учун енгил кредитлер берилмесе де ярамай.

Генгешде башгъа масъалалагъа да къаралды.