Ерлердеги савлукъ сакълавну яхшылашдырмакъ учун къабул этилинген Федерал программагъа гёре, ­Дагъыстанны савлукъ сакълав министерлиги санитар автотранспорт гьисапда республиканы поликлиникалары, больницалары учун 91 машин гелтирежек. Шондан къайры да, Дагъыстан Республиканы ёлбашчыларыны якълаву булан 21 «скорая помощь» машин де алгъан.

– Ерлердеги савлукъ сакълавну сан янын гётермек учун иш гёреген Федерал программаны пайдасы булан 2021-нчи йылдан берли бизин республикабызны савлукъ сакълав тармагъыны оьсювюне, алгъа барывуна шайлы къошум этип тура. Алда да медицина идараланы 177 санитар автотранспорт булан таъмин этген эдик. Шолар айрокъда пандемияны къыйынлы вакътилеринде де, гьали де аврувланы больницалагъа, врачланы буса авруйгъанланы уьстюне етишдирмеге, гьар тюрлю анализлени лабораториялагъа элтмеге хыйлы кёмек этди. Энниден сонг да шолар аврувлар учун тийишли къуллугъун кютежек.

– Бу йыл да программагъа гёре ишлерибиз узатыла. Дагъыстан, география якъдан алгъанда, къыйынлы регионгъа гьисаплана. Бир-бир онгайсызлыкълары булангъы ерлеге чалтлыкъда медицина кёмек этмекни бизин учун бек агьамияты бар.
Шо саялы да биз бармагъа къыйын ерлеге къыйышывлу автотранспортну болдурмагъа къарайбыз,–деп ­англатыв берди Дагъыстанны савлукъ сакълав министри Татьяна Беляева.

Программагъа гёре алынгъан санитар автотранспорт ювукъ арада Дагъыстангъа етишежек, «скорая помощлар» буса бираз гечге таба гележек. «Скорая помощь» машинлерде медицина къуллукъчулагъа чалтлыкъда, къувунлу гьалларда кёмек этмеге бары да имканлыкълар, шартлар яратылгъан.