Тамаша тюгюлмю, бугюнлерде гюзлюк ашлыкъланы тюшюмюн къайтарыв Дагъыстанны къыбла боюндан тюгюл, темиркъазыкъдагъы Хасавюрт райондан башланды?!

– Бу йыл республикабызны ашлыкъ оьсдюрювчюлерини умуми гьаракаты булан гюзлюклерден 230 минг тон арпа ва будай бюртюк алмагъа гёз алгъа тутулунгъан, – дей ДР-ни юрт хозяйство ва сурсат министри Мухтарбий Ажеков. – Савлай Дагъыстанда гьар гектардан орта гьисапда 25 центнер ашлыкъ къайтармагъа умут этиле. Шо кёпмю яда азмы? Оьтген йылны натижалары булан тенглешдиргенде, бу йыл ашлыкъланы гьар гектарындан 2 центнер артыкъ тюшюм къайтармагъа гёз алгъа тутулгъан.

Хасавюрт районда Байрамавулдагъы «Голден Стар» деген ихтиярлары дазуландырылгъан жамиятны авлакъларында ашлыкъланы къайтарыв къурумлу кюйде салынгъан.

– Бизин ашлыкъ оьсдюрювчюлерибиз оьзлени сыйлы борчуна намуслу кюйде янаша, – деди эсгерилген жамиятны башчысы Жамболат Моллакъаев. – Не чачсанг, шону аларсан деп негьакъ айтылмагъан. Айтмагъа сюегеним, гюзлюклени сайламлы урлукъларын биз Краснодар крайдан гелтирип чачгъан эдик. Ашлыкълагъа этилинеген къуллукълар оьз болжалларында сан яны булан оьтгерилди. Озокъда, шону натижалары гьакъда бугюн толу баянлыкъ бермеге эрте. Тек гьар гектардан алынагъан бюртюкню къадары 25 центнерден кем болмажагъы шексиз.

Бизин республикабызда оьтген йыл гюзлюклер, арпа ва будай 95 минг гектар майдангъа чачылгъан эди. Шону 19 минг гектар майданын хасавюртлу ашлыкъ оьсдюрювчюлер чачгъаны гьакъда да айрыча эсгермеге сюесен. Хасавюрт бойдан сонг Къарабудагъгент, Ногъай, Къызлар районланы ашлыкъ оьс­дюрювчюлери де къыйышып гелеген кюйде, бу гезик аслам гектарларда ашлыкъ къайтармагъа гьаракат эте.

Дагъыстанны юрт хозяйство ва сурсат министри берген баянына гёре, буссагьатгъы вакътиде бизин республикабызда ашлыкъланы орувда 425 комбайн къуршалгъан. Демек, къайтарывгъа бар техниканы 95 проценти алданокъ ярашдырылып гьазирленген болгъан.

Гюзлюклени къайтарывда бары да техника толу кюйде къуршала. Тек республикабызны техника базасын беклешдиривге янашывну гележекни борчларын гёз алгъа тутуп тергевсюз къоймагъа тюшмей.