Ватангъа аминлик - бек уллу даража

яда Патриот ругь къайдан геле, нечик сакълана?..

Гьар кимге де оьзюню уллу Ватанына чыкъмакъ учун гиччи ватандан оьтме тарыкъ бола. Оланы экиси де бир йимик тарыкълы. Уллусу сени тышдан гелме болагъан яманлыкълардан къоруп сакълай. Гюнюнгню ярыкъ этмек, яшавунгну дагъы да онгайлы этмек учун гьаракат юрюте.

Тувгъан, оьсген еринг де аявлу. Ону ана булан тенглешдирме ярай. Уллусу буса – ата. Экиси де булан бир агьлюде яшамакъ – гьар-бир ватандаш учун болмагъа герекли дагьни. Белгили язывчу да айтгъанлай: «Гёрмекли Ватан – герти насип».

Россия пачалыкъ йимик тарихи бай уьлкелер аз. Дюнья оьлчевде кёп тюрлю гёрмекли уьстюнлюклеге етишген. Тек ону тарихинде къыйынлы заманлары да болгъан. Монгол-татарланы 300 йылланы узагъындагъы Россиягъа зараллы юрюлген давларын ва ясакъ жыйыв гьаракатын эсгерсек де, ойлашма зат бар. Ювукъ хоншулары сама да, гьар заман ону байлыкъларына дамагьланып, не буса да бир еринден хантавлатып «хапма» кёп къарагъан. Император 1 Пётрну заманындан берли де Россияны биринчи даражалы ич политикасы, оьзюне къаршы къылыч сувуруп гелгенлерден сакъланмакъ болгъан. Башгъача айтгъанда, гючлю, биревге де харлы болмайгъан пачалыкъ этип юрюмек аслу борч гьисаплангъан.  

Шо саялы да Россияда толу кюйде патриот ругь гётерилген деп айтма ярай. Ватанны сююп билмек, ону якъламакъ деген ругь байлыкъны оьзлени ич дюньяларында болдуруп да, сакълап да билмеге уьйренген. Шолай патриот ругь бизин халкъгъа Уллу Ватан давда да кёмек этди. О болмагъан буса, уьстюн гелме де бажарылмас эди.

Патриот ругьну пайдасы бизин Ватан учун СССР уьлкеси къурулуп башлагъан вакътилерде де кёмек этди. Бирлери о ерин англама сюймей. Россия деген пачалыкъ бир башлап оьзюню аманлыгъын болдуруп сакъламакъ учун огъар къурдаш пачалыкъланы «Союзу» тарыкъ экенни англады. 15 пачалыкъ бир-бирине кёмек этип яшады, оьсюп экономикасын ва гючюн артдырма да имканлыкълар тапды. Халкъыны патриот ругьун да артдыра туруп, къурдашлары булан бирче къудратлы болмагъа тарыкъбыз деген ёллар булан юрюдю.

Къайсы уьлке де оьзюню оьсювюн ва къудратлыгъын артдырсын учун халкъыны Ватанына бакъгъан сюювден ясалагъан ругь байлыгъы да артма герекдир деп эсиме геле. Тек о оьзлюгюнден оьсеген «емиш» тюгюл. Огъар да къуллукъ тарыкъ. Совет заманланы эсге алып къарасакъ, шо «емишни» нечик асырап оьсдюрегени гёрюнежек.

Оьтген девюрню яхшысына не учун гёз юмма тарыкъбыз? Шо ери англашылмай. О замандагъы пионер, комсомол къурумлар яш наслуну яман къылыкълагъа уьйретмей эди чи... Гиччиде берилеген тарбия болмаса, уллу болгъанда не айта турсанг да пайда ёкъ.

Артдагъы вакъти уьлкени орта билим береген охув ожакъларында пионер къурумланы къурма тарыкъ деген пикрулар арагъа чыкъма башлады. Гертиден де, о – бек умпагьатлы иш ва Ватан учун пайдалы, болмаса ярамайгъан патриот ругь денгизине элтеген оьзенлени бириси. Гиччи оьзенми, уллу оьзенми, айтма къыйын. Тек аслуларындан бириси экени мекенли.

Ватангъа бакъгъан сюювден амалгъа гелеген гьаракат борчгъа этилмей. Ону къайтарышын къаравуллап турма да тюшмей. О магъа не этген, не учун мен патриот болма тарыкъман деп ойлашагъанлар да ёлукъмай тюгюл. Олай пикрулагъа къуллукъ этип яшайгъанлар, туврадан айтгъанда, бир онгайлы вакъти Ватанына арт берме де бола. Украина булан оьрчюкген гьаллар да шогъар къулакъасдыра.