Дагъыстанны Конституциясын белгилейген гюн, июль айны 26-сында, бизин республикабызгъа Бирлешген Арап Эмиратланы Россиядагъы толу ихтиярлы вакили Могьаммат Агьмат аль-Жабер гелди. Дагъыстанны Башчысы Сергей Меликов сыйлы къонакъны бизде гьар тюрлю маллар чыгъарагъан тармакъланы ишлери, республиканы гёзел ерлери булан таныш эте туруп, Европада инг де терен (1929 метр), 53 чакъырым узунлугъу булангъы Солакъ каньонгъа алып баргъан. Сонг буса огъар тизив онгайлыкълары бар деп саналагъан «Каспий» санаторийни гёрсетген, олай да, Къарабудагъгент райондагъы алдынлы хозяйстволардан гьисапланагъан юзюм оьсдюреген «Герей-Тюз» деген агрофирмагъа етишмеге де чола тапгъан. Могьаммат Агьмат аль-Жаберге дагъы да хыйлы ерлеге гёз бакъдырмагъа имканлыкъ болгъан.
Алдагъы гюн буса Магьачкъаладагъы Дослукъну уьюнде Бирлешген Арап Эмиратланы Россиядагъы толу ихтиярлы вакили Могьаммат Агьмат аль-Жаберни етим яшлар ва ата-ананы къаравундан магьрюм къалгъан яшлар булан ёлугъуву оьтгерилди. Шонда Дагъыстан Республиканы Гьукуматыны Председателини заместители Муслим Телякъавов, Дагъыстанны билим берив ва илму министри Ягьия Бучаев ортакъчылыкъ этди.
Бу шатлы жыйынны Дагъыстанны Гьукуматыны Председателини заместитети Муслим Телякъавов ачды ва оьзюню сёйлевюнде булай эсгерди:
–Яшлар, айрокъда етим къалгъан авлетлер гьукуматыбызны гьайлы янашывун бек гёзлей. Россия Федерацияны ва Дагъыстан Республиканы гьукуматлары яшланы ихтиярларын якъламакъ, оланы талапларын яшавгъа чыгъармакъ муратда тийишли чаралар гёре. Биз бу яшлар яшавдан къувангъанны, оьзлени жамиятны толу адамларыбыз деп гьис этгенни сюебиз. Шону учун да биз олагъа оьзюбюзню къолубуздан гелеген кёмекни, инсаплы ишлени этмеге къасткъылабыз.
Ону гиришив сёзюнден сонг Могьаммат Агьмат аль-Жабер жыйылгъанлар булан илиякълы кюйде саламлашып, Бирлешген Арап Эмиратланы да, Россияны да дос аралыкъларын сакъламакъны, дагъыдан да беклешдирмекни бек агьамияты барны белгиледи. Могьаммат Агьмат аль-Жабер таъсирли сёзюн айта туруп, ойларын ачыкъ этди:
– Пандемияны заманында уьйлеринден таба охуйгъанлыкъны, дарслар юрютегенликни агьамиятлыгъы артгъан эди. Бизин учун да сиз, яшлар, санлы билим алмагъа иштагьланагъаныгъызны оьтесиз маънасы бар. Бугюн биз Дагъыстанда къаныгъывлу кюйде чалышып, охувда инг де гёрмекли ерлени тутгъан, англавлу болмагъа къасткъылагъан яшлагъа ноутбуклар бермеге токъташдыкъ,–деди ва сёзюню ахырында кёплер умут этеген «Lenovo» маркалы ноутбукланы савгъат этди.
Дагъыстанны билим берив ва илму министри Ягьия Бучаев яшланы охув йыл битгенлиги булан къутлап, олагъа энниден сонг да яхшы уьстюнлюклеге етишмекни ёрай туруп, оьзюню сёзюн узатды:
– Сизге яшавну нечакъы айланмаларын сезмеге, оьрлюклеге талпынмагъа тюшген. Гьали энниден сонг да дагъы да яшавну кёп тюрлю ёлларындан оьтмеге, янгы уьстюнлюклеге етишмеге енглеригизни чююрюп гьаракат этмеге тарыкъ болажакъ. Оьзюгюзню гючюгюзге инанывугъуз артсын, алгъан билимлеригиз учун сизин юреклеригизде тувулунгъан оьктемлик дагъыдан да бек оьзюгюзню инг толу инсанларбыз деп гьис этмеге, пагьмугъуз булан дюньяны елемеге къуват берсин,–деди министр.
Гертиси, етим яшлагъа кёмек этив – республиканы социал политикасыны аслу масъалаларындан бири. Шону да гёз алгъа тутуп, къошум кёмек гьисапда чарасыз, гьаран яшайгъан агьлюлерде тарбияланагъан школа чагъына етишген 240 яшгъа портфеллер де берилежек.
Паху ГЬАЙБУЛЛАЕВА.
СУРАТДА: яшлагъа савгъатлар тапшурагъан вакъти.
