Бизин республикада спортну къайсы журасына да тезден берли агьамият берилип геле. Тек бугюнлеге ерли спортну къышлыкъ, демек, тогъатартывлар къарны ва бузну уьстюнде юрюлеген жураларына тийишли тергев берилмегени гьакъда айтмагъа бажарыла. Шогъар да къарамайлы, буссагьатгъы вакътиде Австрияда яшайгъан бизин якълы агъа-ини Магьамматсалам ва Гьажимурат Гьажиевлер гьар къайсы ярышда да хоккей оюнда оьзлер къуршалгъан командагъа пайда, хайыр гелтирип, мекенли уьстюнлюклеге етишип геле.
Алдагъы гюнлерде Чехиядагъы Мост деген шагьарда оьзлеге 18 йыл битмеген яш спортчуланы командалары ортакъчылыкъ этген турнирде де тап шолай болгъан. Чехияны, Австрияны, Германияны, Словакияны ва Швейцарияны гьар тюрлю шагьарларындан гелген командалар оьзлени арасында хоккей оюнда тогъатартгъан.
Дагъыстанны физкультурагъа ва спортгъа къарайгъан министрлигини прес-къуллугъу бизге билдирегени йимик, оьрде оьзлени аты эсгерилеген агъа-ини Гьажиевлер австриялы Okanagan командагъа къуршалып ойнагъан. Оьтгерилген шо турнирде Магьамматсалам къапулагъа лап да кёп гол гийиргенлени сыдырасына къошулгъан. Ачыкълашдырып айтгъанда, турнирни бары да тиретлерини барышында ол 6 гол гийирмеге бажаргъан. Шону булан бирге, ол ёлдашларына оьзлеге къаршы туруп ойнайгъан командаларыны къапуларына дагъы да 5 шайбаны гийирмеге болушлукъ этген. Шолайлыкъда, шо турнирни вакътисинде ол 11 очко къазангъан ва лап кёп гол гийиргенлени арасында экинчи ерге ес болгъан.
Шо гьакъда айта туруп, турнирни лап яш ортакъчысы, оьзюне 16 йыл тюгюл битмеген Гьажимурат къапуланы инг тизив сакълавчусу гьисапда белгили болгъанын да айрыча эсгермеге тюше.
Насрулла БАЙБОЛАТОВ.
