Бизин  республикада яшавгъа чыгъарылгъан «Футбол в школе» деген  проектни оьлчевюнде Россияны футбол союзуну  вакиллери Евгений Алдонин, Руслан Пименов, Елена Медведь, Борис Никоноров  ва Алексей Гасилин охув ожакъларда билим алагъан уланлар ва къызлар учун «футболдан дарс» оьтгерген.

Шо гьаракатны оьтгеривге байлавлу  юрюлген чарада ДР-ни Гьукуматыны Председателини заместители Муслим Телякъавов, билим беривге ва  илмугъа къа-райгъан министри Ягьия Бучаев ­ физкультурагъа ва  спортгъа къарайгъан министрини заместители Будун Будунов ортакъчылыкъ этген.

Инг алда Россияны футбол союзуну методистлери Дмитрий Баранник ва Евгений Семенов яшлагъа футбол оюнну къайдалары гьакъда англатыв  берген. Шону  булан  бирге,   футболдан  юрюлген бир-бир оюнланы гёзден гечирген,  муаллимлер булан къатнагъан.

Яшланы сююндюрген фестиваль къайдада оьтгерилген  шо  гьаракатда 400-ден де артыкъ охувчу яш ортакъчылыкъ этген. Россияны футбол союзуну  вакиллери яшлар булан  бирче топ да ойнагъан. ­ Шондан сонг  гелген къонакълар булан сурат чыгъармагъа гьар яшгъа да имканлыкъ берилген.

Эсгерилген фестиваль ДР-ни  Гьукуматыны,  билим беривге ва  илмугъа, олай да  физкультурагъа ва  спортгъа къарайгъан министерликлерини,  бизин республиканы футбол федерациясыны  якълаву булан юрюлген.

 

Насрулла БАЙБОЛАТОВ.