Артдагъы 5-6 йылланы ичинде «Савлукъ сакълав» деген федерал программаны талапларын яшавгъа чыгъармакъ учунгъу хыяллар  булан, айрокъда бир-бир юртларда савлукъ  сакълав тармакъгъа кёп-аз буса да агьамият берилип турагъанны гьис этмей де тюгюлбюз. Мисал учун, гезиги булан фельдшер-акушер пунктлар да къурула яда шолар янгыртыла, ерли жамиятгъа биринчи кёмекни этмеге болар  йимик онгайлыкълар яратмагъада къарайлар. Бу масъалагъа байлавлу алдагъы гюнлерде де Дагъыстанны парламентини жыйынында да сёз юрюлдю.

 

Шо гюн Халкъ Жыйыныны депутатларыны гезикли сессиясында Дагъыстанны савлукъ сакълав министри Т. Беляева республикадагъы савлукъ тармакъны бугюнгю гьалы гьакъда доклад этди. Ону сёзлерине гёре,  артдагъы 5 йылны ичинде республикабызда 125 фельдшер-акушер пункт (ФАП) къурулгъан. Ондан къайры, 315 койка ерлешдирилген, умуми алгъанда, 12 больница ва амбулатор-поликлиника идаралар ишлетилинип тапшурулгъан. Олай да, 135 медицина бина  ярашдырылгъан. Ерлердеги медицина пунктланы, больницаланы тарыкъ-герек булан таъмин этегенлик де артгъан.

Шо мезгилде  етишмейген медицина аппаратлар, автомобиллер болдурулгъан. Айтагъаныкъ, 284 «Скорый помощ» автомашин ва 371 санитар автотранспорт алынгъан. Ерлердеги медицина идаралар учун къайдада элтмеге  онгайлы  тийишли медицина ясандырывлар булангъы 73 автомашин алмагъа имканлыкъ болгъан.

Савлукъ сакълавну министри яшлагъа медицина кёмек этивню сан яны яхшылашып барагъанны да белгиледи. Ол билдирген кюйде, аналаны, янгы тувгъан яшланы оьле­ген гезиклери де  кемиген.  Яшгъа токътагъан, тапмагъа заманы етишген къатынлагъа кёмек гьисапда  онлайн къайдада консультация этмек учун оьр даражалы, англавлу врачлар-касбучулардан группа къурулгъан.

– Региондагъы проектлени де яшавгъа чыгъармакъ муратда  14 фельдшер-акушер пунктну, 4 врач амбулаторияны, 75 савлукъ сакълав учреждениени ярашдырмагъа  ва  6 объектни янгыдан онгармагъа, 1063 ва  шолай да 2 авур тайпа медицина ясандырывлар, 158 санитар автотранспорт алмагъа  гёз алгъа тутгъанбыз, – деп токъташдырды  Т. Беляева.

Шонда Дагъыстанны Халкъ Жыйыныны Председатели З. Ас­кендеров гётерилген масъалагъа гёре ойларын айта туруп, этилген ишлер аз тюгюл буса да, тек савлукъ сакълав тармакъда хыйлы чечилмеген масъалалар да барны эсгерди. Мисал учун, енгилликлерден пайдаланагъанлар  тарыкълы  дарманлар булан таъмин этилмейгенни  айтды. Парламентни башчысы ватандашлар булан лакъыр юрютгенде, олар узакъ заман тийишли дарманланы алма болмайгъангъа арз этгенлер. Аврувлар дагъы башгъа амалы ёкъгъа шо дарманланы оьз харжына сатып алмагъа борчлу экенни ачыкъ этди.

– Мен эсигизге салма сюемен, бу йылгъа бюджетни токъташдырагъанда, депутатлар республиканы гьукуматы булан бирге енгилликлерден, гьавайын дарманлардан пайдаланагъан ватандашланы  герекли  дарманлар булан таъмин этмек учун гёрсетилеген харжны артдырмагъа бажарылды.  Шогъар да, халкъны савлугъун якъламакъ учун юрюлеген ишлеге де айрыча тергев бергенигизни сюемен, – деди Дагъыстанны савлукъ сакълав министрине З. Аскендеров.

Ондан къайры да, Дагъыстанны Халкъ Жыйыныны Председатели билим берив ожакъларда медицина кабинетлер болмагъа  тарыкъны  гьакъында айтды.

– Бу масъалагъа да Халкъ Жыйы­ныны янындагъы билим берив комитетни генгешинде  къаралды. Депутатлагъа билим берив ожакъларда медицина кабинетлер ачмагъа ихтияр береген шагьатнамалар булан таъмин этеген кюю нечик юрюлегенин тергемеге тапшурулгъан. Мен шогъар къыйышагъан тийишли буйрукъгъа  къол салгъанман. Шону агьамиятлы, узакълангъан масъала  Дагъыстанны Башчысы Сергей Меликов къошулгъан сонг еринден тербенип, жанланып гетди. Шону  учун сиз, Татьяна Васильевна, Билим беривге ва илмугъа къарайгъан­ министерлик булан бирге шо талапны яшавгъа чыгъармакъны тилеймен, – деп тапшурув берди  З. Ас­кендеров.

 

П. ГЬАЙБУЛЛАЕВА.