Савлай Россияда йимик, Дагъыстанда да артдагъы йылларда айлана якъда тувулунгъан четим гьалланы гьисапгъа алып, промышленный тармакъда асувгъа ишлейген айрыча предприятиелеге пачалыкъны янындан кёмеклешивню тюрлю-тюрлю ёллары ахтарыла ва танглана. Неге десегиз, бизин республикабызда промышленный предприятиелер гьар тюрлю бюджетлеге тюшеген налогланы 30 процентден къолай пайын бере.
Бугюнлерде ДР-ни промышленност ва сатыв-алыв министри Низам Халилов оьтгерген прес-конференция шолай агьамиятлы масъалагъа багъышлангъан эди. Оьзюню баянында эсгерилген тармакъланы гьакимбашы сёйлевюн республикабыз учун лап да агьамиятлы адамланы ишге къуршавну ва оланы гелимлерин артдырывну гьакъында башлады.
–Артдагъы маълуматлагъа гёре бизин республикабызда ишге гючю чатагъан тайпаланы 15 проценти ишсиз, – деп узатды оьзюню сёзюн Низам Халилов.
– Шогъар да къарамайлы, бугюнлерде бизин республикабызны промышленный предприятиелери учун иш къоллар етишмейгени ичингбушдура. Шону учун промышленный предприятиелер харж да айырып, яш касбучуланы уьйретмеге борчлу бола. Буйнакскидеги аякъгийим фабрик де, Магьачкъалагъа ювукъда къурулгъан ва ишге берилген шиша шариклер гьазирлейген предприятиелер шолайларындан санала. Дагъысын айтмагъанда, буссагьатгъы вакътиде Буйнакскидеги аякъгийимлер чыгъарагъан фабрикге 150-ге ювукъ касбучу етишмей. Шолай четим тиеген масъалаланы тергевсюз къоймагъа тюшмей. Айтмагъа сюегеним, бугюнлерде бизин республикабызда да промышленный предприятиелеге харж булан кёмеклешивге байлавлу болуп хас фонд къурулгъан.
Белгили болгъан кюйде, эсгерилген фонддан таба промышленный предприятиелер къайтарыш болжаллары ва уьстюне салынагъан къошум гьакълары-процентлери енгиллешдирилген харжлардан пайдалана. Шолай харжланы оьлчевлери де башгъа-башгъа. Демек, 20 миллиондан 70 миллионгъа етише.
Прес — конференцияда аянлашдырылгъаны йимик, кёмекге берилеген харжлар промышленный предприятиелени производствосун беклешдирмек учун тарыкълы техника къуралланы ва ясандырывланы сатып алмакъ учун гёрсетилине. Техника учун харжлагъан акъча маяланы умуми къадарындан 10 миллион манаты кёмек фонддан таба къайтарыш этилине. Дагъы да ачыкълашдырып айтсакъ, къайтарыш этилинеген акъча маяланы умуми оьлчевю алынгъан техниканы багьасыны 50 процентинден оьрде болмагъа тюшмей.
ДР-ни промышленност ва сатыв-алыв министри прес- конференцияны ахырында республикабызны маълумат къуралларыны къуллукъчулары берген гьар тюрлю соравлагъа жаваплар къайтарды. Шогъар байлавлу баянны генг кюйде газетибизни гелеген номерлеринде бермеге умут этиле.
Къ. Къараев.
