Октябр айны 10-нда Дагъыстан Республиканы Милли политика ва дин ишлерине къарайгъан министерлигинде Луганск халкъ республикада инсаплы кёмек этивню ортакъчылары, «Единая Россия» партияны Каспийск шагьар бёлюгюню секретары, депутатланы шагьар жыйыныны председатели Абдулвагьит Жаватов ва Дагъыстан Республиканы Гьукуматыны Хабаровск крайдагъы вакили Бейдулла Исаев булангъы прес-конференциясы оьтгерилди.

Ёлугъувну ача туруп, Дагъыс­тан Республиканы милли политика ва дин ишлерине къарайгъан министри Энрик Муслимов бу эки де ёлдаш бираз алда инсаплы кёмекни къуллугъун яшавгъа чыгъара туруп Луганск халкъ республиканы Лисичанск шагьарына барып гелгенни эсгерди.

– Бизин республикада инсаплы кёмек этмек ва асгерге чакъырывну къурумлу оьтгермек учун кёп иш этиле. Бизин дагъыстанлылар асгер операцияда биринчилерден болуп ортакъчылыкъ этме башлады. Олар гёрсетген къоччакълыкълары учун ­уьчевюне Россия Федерацияны Игити деген атлар ­берилди, – деп узатды сёзюн Э. Муслимов.

Сонг Абдулвагьит Жаватов ва Бейдуллагь Исаев ­оьзлени инсаплы кёмек кютмек учун барып гелген сапарыны гьакъында айтдылар. Журналистлени соравларына жаваплар берди.