Магьачкъалада яшайгъан адамланы умуми санаву йылдан-йылгъа артып тура. Шогъар гёре оланы яшавлукъ-коммунал къуллукълагъа бакъгъан якъдагъы талаплары да арта бара.

 

Бугюнлерде ДР-ни Гьукуматыны Председатели Абдулмуслим Абдулмуслимов ва Магьачкъала шагьар округуну башчысы Юсуп Умавов тахшагьарыбызны баш майданында адамланы алып юрютеген 47 янгы пассажир автобусну къабул этген. Алданокъ токъташдырылгъаны йимик, янгы автобуслар 64, 65 ва 44а маршрутлардагъы пассажирлени транспорт къуллукъларын кютежек.

Юсуп Умавовну баянына гёре янгы автобусланы къуллукъларындан гюнде 30 мингге ювукъ пассажир пайдаланмагъа болажакълар.

Эсгерилген маршрутлар барысы да Магьачкъаланы темиркъазыкъ бойдагъы янгы автостанциясындан оьтежеги гьакъда да айрыча эсгерме тюше. Шолайлыкъда ленингентли ва семендерли пассажирлени алып юрюме де онгайлыкълар яратылажакъ.

 

Бизин мухбирибиз.