Артдагъы вакътиде Украина бойда юрюлеген хас асгер гьаракатда асгер къуллукъчуланы ва гёнгюллю кюйде къуллукъ этегенлени санаву артса тюгюл, кемимей. Бугюнлерде эсгерилген гьаракатны ортакъчысы Гьюсен Акъавов булан ёлугъув оьтгерилди.
Шо ёлугъувда Къызылюрт районну Чонтавул юртунда ерлешген 2-нчи орта школасыны директоруну заместители Юлдуз Гьимбатова, пионервожатый Рашия Къойчуева, география дарсны юрютеген Абидат Акъаева ва школаны охувчу яшлары ортакъчылыкъ этдилер.
Гьюсен Акъавов 2022-нчи йылны сентябр айыны 26-сындан берли хас гьаракатда ортакъчылыкъ эте. Ол Запорож областны янында денгиз пехотаны бёлюгюнде асгер къуллугъун кютген. Онда ортакъчылыкъ этеген заманны ичинде гёрсетген къоччакълыгъы учун 2023-нчю йылны язбашында Гьюсенни «За воинскую доблесть» деген медаль булан савгъатлайлар.
2023-нчю йылны июл айыны 13-нде бир ерден бир ерге гёчегенде артиллеристлени колоннасы Himars деген реактивный системаны атышывуну тюбюне тюше. Шонда къаркъарасына тийген гьар тюрлю яралары булан Гьюсенни Кърым атавда ерлешген Симферопол шагьардагъы госпиталгъа етишдирелер. Яралары саялы ол тувгъан, оьсген элине къайта.
Россияны Президенти Владимир Путинни указына гёре, хас гьаракатда асгер борчун кютювде гёрсетген къоччакълыгъы учун Къызылюрт районну Чонтавул юртундан чыкъгъан Гьюсен Акъавов Къоччакълыкъ орден булан савгъатлангъан.
Гьюсен Акъавов оьзюню дав касбусун мекенли танглагъаны гёрюнюп тура. Ол Ватанны герти якълавчусу да дюр.
Гьюсенни айтывуна гёре, хас дав гьаракатны ортакъчыларын савлай бютюн элибизни халкъы якълай ва оланы къоччакълыгъына оьр багьа да бере. Ол дагъы да сёзюн узатды: «Мен ял алмакъ учун уьюмде, ожагъымда токътагъанман. Оьзюм уьйде бусам да, юрегим ондагъы дав ёлдашларым булан. Бизин яшларыбызны гётерилген ругьун бир душман да сёндюрмеге болмажакъ. Бизин элибизни дазуларына миллетчилик аврувну дагъы яйылма къоймагъа тюшмей. Шону мени ёлдашларым бек яхшы англай. Биз уьстюнлюкню къолдан чыгъармажакъбыз! Шону булан биз оьктембиз!» – деп оьзюню сёйлевюн тамамлады ва асгер къуллукъчуланы уьстюне салынгъан борчлары тюзевлю кютюлежегине инанагъанын ташдырып айтды.
Алибек САЛАВАТОВ.
