Темиркъазыкъ-Кавказ федерал округдагъы Россия Федерациясыны Президентини толу ихтиярлы вакили Юрий Чайка аманлыкъны, коррупциягъа къаршы иш гёрювню ва жамият низамны масъалаларына байлавлу видео байлавлукъда генгеш оьтгерген.

Генгешде Дагъыстан Республиканы Башчысы Сергей Меликов да ортакъчылыкъ этген. О гьакъда регионну ёлбашчысыны прес-къуллугъу билдире.

Юрий Чайка генгешни ача туруп эсгерген кюйде, округну тыш уьлкелер булангъы дазу бойдагъы аманлыкъны беклешдирип сакъламакъ – пачалыкъ агьамиятлыгъы булангъы иш. Темиркъазыкъ Кавказ региондан чыгъагъан ва гиреген таможня пунктланы къуллукъчуларыны уьс­тюне тюшеген жавапчылыкъ айрокъда бу бизин заманда Россияны сюймейген уьлкелер экономика санкциялар къоллап юрюйген вакътиде бир нече керенлеге арта.

Толу ихтиярлы вакил бирдагъы билдирген кюйде, машин ёллардагъы пропуск пунктларда айрокъда мекенли сакълыкъ болдурма тарыкъ. Биринчилей: «Верхний Ларс» ва «Яраг-Казмаляр» деген таможня пунктланы ишлерин мекенлешдирме, «Магьачкъала» портну ва «Дербент» (Самур) темир ёлдагъы гюмрюк пунктларда гелеген, гетеген транспортгъа онгайлыкълар этме герек.

Озокъда, гюмрюк пунктланы иши яхшылашсын учун инг де тарыкълысы, о да – онда ишлейгенлени оьз ишлерине намуслу янашыву, жавапчылыкъны артдырма гереклиги. Шо жавапчылыкъ – коррупциягъа къаршы гьаракат юрютмекни ва закон ёллардан чыкъмай ишлемекни талап эте.

Темиркъазыкъ-Кавказ федерал округдагъы толу ихтиярлы вакил Юрий Чайка генгешни тамамлай туруп, гьаракатны яшавгъа чыгъар­ма тарыкълы гьакимият къуллукъчулагъа буварыв тапшурувлар берген.