Итнигюн, апрель айны 4-нде, Дагъыстанны милли масъалалагъа ва дин булан байлавлу ишлеге къарайгъан министерлигини янында иш гёреген жамият советини генгеши оьтгерилди.
Инг алда эсгерилген жамият советини ёлбашчысы Руслан Гереев гюнлюк низамы булан жыйылгъанланы таныш этип сёйледи. Шону булан бирге, бу йылны боюнда яшавгъа чыгъармагъа гёз алгъа тутулгъан сиптелени малим этди.
Шондан сонг ДР-ни милли масъалалагъа ва дин булан байлавлу ишлеге къарайгъан министри Энрик Муслимов жамият советге къуршалгъанлар булан муратгъа къыйышагъан кюйде мекенли иш юрюлюп гелегени гьакъда айтды. Жамиятны янындан тергев болдурагъан къурум гьисапда министерликде иш гёреген шо советини чалышывуну агьамиятлыгъы гьакъда эсгерди.
Оьтгерилген генгешни барышы да министрни заместители Арсен Магьмутов далапчылыкъ булан машгъул болмайгъан къурумларыны уллу жыйынына не къадар гьазирлик гёрюлегени гьакъда баянлыкъ берди. Ону сёзлерине гёре, шо ёлугъувда Донецк ва Луганск халкъ республикаларда, олай да Херсон ва Запорожск областларда иш гёреген къурумларыны вакиллери де чакъырылгъаны гьакъда билдирди. Эсгерилген чара май айны 14-ден 18-не ерли юрюлежек. Ол билдиргени йимик, август айны 6-сындан тутуп, 9-уна ерли тышда яшайгъан дагъыстанлыланы форуму оьтгерилежегин ташдырды. Шонда 30 пачалыкъдан гелген бизин якълылар ортакъчылыкъ этежек деп къаравуллана.
Шондан сонг, министерликни къуллукъчусу Гьажимурат Умаханов урушбатчылыкъны ва оьзге жинаятчылыкъланы алдын алывгъа байлавлу не йимик ишлер юрюлегени гьакъда баянлыкъ берди. Оьз гезигинде ДР-ни дин ишлеге къарайгъан бёлюгюню ёлбашчысы Расул Гьажиев мердешли кюйде юрюлеген жагьиллени къуршайгъан жыйынны да бу йылда оьтгермек учун гьазирлик гёрюлегени гьакъда айтды.
Генгешде гьакимлик къурумларыны янында иш гёреген жамият советлерине къуршалгъанланы ортакъчылыкъ этивю булан гьар тюрлю гьаракатлар оьтгеривню масъаласы да арагъа салынып ойлашылды. Шолай иш гёрюв чалышывуну гьасиллерин чыгъарывгъа, олай да сынав алышдырма къошум имканлыкълар яратагъаны да айтылды. Жамият советине къуршалгъанлар арагъа салынып ойлашылгъан масъалалагъа байлавлу пикруларын айтып, генгеш оьзюню ишин тамамлады.
