• Спорт

Дагъыстанда инг де кёп яш машгъул болагъан спортну айтса, тутушуп ябушувну эсгере. Артдагъы йылларда ябушувну гюнтувуш къайдалары да арагъа чыгъып геле ва шо спортдан да дюнья оьлчевде гёрмекли оьрлюклеге етишгенлер бар.

Артдагъы маълуматлагъа гёре, яшёрюмлени кёбюсю артда арагъа чыкъгъан грэпплинг ва джиу-джитсу ябушувланы кёп ушата. Шо ябушувланы юрютмек учун бизин якълылагъа хас къаттылыкъ ва чалтлыкъ тарыкъ. Булайына алгъанда, шо ябушувларда самбо, дзюдо ва тутушуп ябушувну къайдалары бирикген.

Биз оьзюню гьакъында айтма сюеген Жамал Мициев башлап тутушуп ябушувгъа гелсе де, заман гетип, грэпплинг ябушувну сайлагъан.
2020-нчы йылда ол AGATE деген спорт клубгъа чыгъа, грэпплинг ва джиу-джитсу ябушув булан машгъул болма башлай. Тренерлери Арсен Шапиев ва Эфган Галоев бу яшны гьаракатын эс эте ва къыставуллу уьйрете. Заман гетип, Жамал Мициев шу эки де ябушувдан оьр канзилеге мине ва спортну устасына кандидат бола.

Жамалны уьстюнлюк­лери кимни де сююндюре. Дагъыстанны, Темиркъазыкъ-Кавказ федерал округуну ва Россияны 6-шар керен чемпиону болгъан Жамал Мициев дюнья оьлчевдеги ярышлагъа да йиберилип тургъан. Шоларда да ол 3 керен дюньяны чемпиону деген атны алгъан.
–Къызымны яшы Жамалны биринчи керен спортзалгъа мен элтген эдим, – дей уллатасы Дагьир Абдурагьманов. – Онда яшдан берли жагьлыкъ, чалтлыкъ ва къаттылыкъ бар эди. Бугюнлерде оьзюню авурлугъуна гёре ондан артыкъ ябушагъан жагьил ёкъ, ол бир нече керен Да­гъыстанны, Россияны ва дюньяны чемпиону болгъан. Дагъы затны айтмагъанда, грэпплинг ва джиу-джитсу ябушувлардан спортну устасына кандидат болгъан.

– Жамал 5 керен Бютюнроссия (UWW) ярышларда да алдынлы болуп гелди, – деп къоша атасы Мурат Мициев. – Бу йыл март айда Назран шагьарда Россияны оьлчевюндеги ярышлар оьтгерилди. Жамал шону да утуп гелди. Мен де ону гьар яндан да ругьландырып ва якълап тураман.
Мурат Мициев – хамав­юртлу, агьлюсю булан Магьачкъалада яшай. Уланы Жамал 2006-нчы йылда Магьачкъалада тувгъан ва шагьардагъы 34 номерли школада охугъан. Бугюнлерде ол – Дагъыс­тан пачалыкъ университетни коллежини «право и судебное администрирование» деген бёлюгюню 2-нчи курсуну студенти.

Биз де Жамалны ­уьстюнлюклери булан къутлайбыз ва спорт ёлунда дагъы да артыкъ оьрлюклер ёрайбыз.