Шу оюну «Анжи» утгъан эди буса, биз премьер-лигада къалажагъыбызгъа кёп адам шеклик этмежек эди. Тек «Анжи» не гьаракат этип де «Зенитни» енгип болмады.
Оюнну башындан тутуп, бизинкилер къонакъланы оьзлени къапусуна къысды, бир-эки къоркъунчлу мюгьлет этме де бажарды. Еттинчи минутдагъы Динияр Билялетдинов къолдан чыгъаргъан мюгьлетни чи къаравчулар ювукъ арада унутуп битер деп эсиме гелмей.
Динияр къолдан чыгъаргъан мюгьлетден аз заман да гетмейли, «Зенитни» чапгъынчысы Рондон, оьзюню командасыны биринчи чапгъынында Кержаковну къапусуна биринчи топну гийирип, оюнну санавун ачды. «Анжи» шо сагьатдокъ, «Зенитни» къапусун гьужумгъа тутду. Башлап Максимов, сонг Смолов яхшы мюгьлетлени ахырына чыгъарып болмады. Узакъ къалмай биринчи тайм бите дегенде, Фёдор Смолов оюнну санавун 1-1 этди.
Сонг танапус – баш тренерлени экинчи таймгъа тактиканы англатыву, командалар этген хаталаны уьстюнде аз заманлыкъ иш...
Экинчи таймда «Анжини» таныма да къыйын эди, шонча да къолайсыз ойнады биринчи тайм булан тенглешдиргенде де. Футбол майданны ва топну къонакълагъа берип, «Анжи» оьзюню къапусуна топ гирип къалмасын дейген пикруну яшавгъа чыгъарма къарады. Оюн битме аз да къалмай, Мигель Данни «Анжиге» экинчи топну гийирди. Тола-толмай жыйылгъан стадион аста булан тозулма башлады....
Ким не айта турса да, «Зенит» «Анжиден» хыйлы гючлю гёрюне эди! Гелеген оюнну «Анжи» къонакълыкъда Рос­товда ойнай.


Ш. Кишиев.