Каспийск шагьарда тутушуп ябушувдан Россияны чемпионаты юрюле. Шо ярышларда тиштайпалар да ябушалар. 21-нчи июнда оьтгерилген ярышларда Дагъыстанны командасы алгъа чыкъды: шо гюн 2 алтын, 1 гюмюш ва 4 бронза медаллар къазандылар.
Къумукъ улан, Олимпия оюнланы чемпиону , 57 кило авурлукъда ябушагъан Завур Угуев финалда яшёрюмлени арасындагъы ярышланы бир нече керен утгъан москвалы Артём Гобаев булан тогъатартды ва алтын медаль къазанды. Шолайлыкъда, Завур Россияны 6 керен чемпиону болду. Шончакъы керен шолай ярышланы Къурумагьаммат Къурамагьамматов да утгъан.
Ярышларда ортакъчылыкъ этген бирдагъы къумукъ улан, бабаюртлу Азнавур Таваев буса уьчюнчю ерни алды ва бронза медаль къазанды. Тутушуп ябушувдан Россияны чемпионаты июн айны 24-ю болгъанча узатылажакъ.
