Гьали-гьалилерде Дербентде оьтгерилген юзюм оьсдюрювчюлени ва чагъыр гьазирлевчюлени регион форуму «Дагвино» деген Комитет къурулгъанлы 100 йыллыкъ юбилейге багъышлангъан эди. Эсгерилген агьвалатгъа байлавлу болуп оьтгерилген шатлыкъ чараларда Дагъыстанны Башчысы Сергей Меликов ва шолай да ДР-ни Халкъ Жыйыныны башчысы Завур Аскендеров гьюрметли къонакълар гьисапда ортакъчылыкъ этди.

Юбилейни гьюрметине багъышланып оьтгерилген шатлыкъ жыйынгъа республикабызны ва шолай да уьлкебизни федерал гьакимият къурумларыны вакиллери, юзюм оьсдюреген юрт хозяйство предприятиелени, татли емишни ишлетеген компанияланы башчылары, касбучулары да чакъырылып гелген эдилер.

«Моряна» деген концертлер юрюлеген уллу залда шатлыкъ жыйынны ортакъчылары юзюмден гьазирленген малланы выставкасы булан ювукъдан таныш болду. Шонда юзюмчюлюк маллардан башгъа Дагъыстанны халкъ саниятларыны усталарыны гьар тюрлю маллары да айрыча бёлюклерде ерлешдирилген эди.

Выставканы бёлюклериндеги маллар булан ювукъдан таныш болгъан сонг, форумну ортакъчыларына Дагъыстанда юзюмчюлюкню оьсювюню гьакъында гьазирленген видеофильм де гёрсетилинди.

Видеофильмден сонг залда жыйылгъанланы ДР-ни Башчысы Сергей Алимович де къутлады. Республикабызны юзюмчюлерини натижалары ва оланы алдында токътагъан агьамиятлы борч­лары гьакъда оьз пикруларын малим этди. Шондан сонг ол республикабызны экономикасыны тармагъында оьз ишинде лап да гёрмекли уьстюнлюклеге етишген юрт хозяйство къуллукъчулагъа савгъатлар да тапшурду. Шатлыкъ жыйынны ортакъчылары РФ-ни юрт хозяйство министри Дмитрий Патрушев йиберген къутлав кагъызын да исси харс урувлары булан къаршылады.

Юбилей жыйынны жамын чыгъара туруп, ону ортакъчыларын ДР-ни Парламентини Председатели Завур Аскендеров да къутлай туруп, оьз ойлары ва пикрулары булан таныш этди.
– Артдагъы йылларда бизин республикабызда савлай уьлкеде йимик гелимли юзюмчюлюк тармакъны ­янгыдан аякъгъа тургъузувгъа айрыча тергев берилегени негьакъ тюгюл, – деп узатды ол оьзюню сёзюн. – Гертиден де, юзюмчюлюк – оьсювге лайыкълы тармакъ. Неге десегиз, юзюмден гьазирленген маллар, ичкилер регион, уьлке ва халкъара оьлчевюнде оьтгерилеген выставкаларда савгъатлы ерлеге ес бола. Айтмагъа сюе­геним, юзюмчюлени загьмат макътавлугъу гьакъында Дагъыстанны тарихинде айрыча хат булан эсгериле. Муна шо саялы да бизге де олагъа гележекде аманлыкъ булан савлукъ ёрай туруп, оьз ишинде янгы уьстюнлюк­лер ёрамакъ къала.

Къ. КЪАРАЕВ.