ДР-ни юрт хозяйство ва сурсат министерлигини прес-къуллугъундан бизге билдирген кюйде, бу йыл декабр айны 3-нчю гюнюнде Дагъыстанны тахшагьары Магьачкъаланы баш майданында загьматчы адамны гьюрметлевге байлавлу болуп биринчи байрам чаралар оьтгерилежек.

Шонда республикабызны бары да районларыны ва шагьарларыны юрт хозяйство предприятиелери, сабанчы-фермер хозяйстволар, айрыча абзар хозяйстволар ва ишлетив промышленностуну вакиллери ортакъчылыкъ этежек деп къаравуллана.

– Загьматчы адамны гьюрметлевге байлавлу байрам чараланы оьтгеривге байлавлу пикруну бизге ДР-ни Башчысы Сергей Меликов ­таклиф этди. Шону биз де арив гёрюп якъладыкъ. Байрам чаралар нечик болгъанына, озокъда, сонгунда оьзлер ортакъчылар багьасын берер, – деди эсгерилген министерликни башчысыны заместители Эмин Шайхгьасанов.

– Шо ярмакюге Хасавюрт районну хозяйстволары да къуршалажакъ, – дей юрт хозяйствосуну ёлбашчысы Идрис Загьалов. – Аслу гьалда яшылчалар, емишлер, шолардан этилген гьазир маллар, гьайван ва къой эт, жибинчиликни маллары болажакъ. Шондан къайры да, «Батыр-бройлер» деген хозяйствону тавукъ этден этилинген 100-ден де артыкъ жура маллар гелтирме хыял бар. Ярмакюге гелгенлеге Хасавюрт районну чатырында милли ашланы татывуна къарама имканлыкъ да болажакъ.