Юзюмчюлюк Дагъыстанны экономикасында яшавну гётереген ва бюджетлеге хайыр береген аслу юрт хозяйство тармагъы санала. Оьтген йыл юзюм оьсдюрювчюлени умуми гьаракаты булан 268 тон татли емиш къайтарылгъан эди.
Белгили болгъаны йимик, етишилген натижа булан дазуланмай, 2023-нчю йылда да 280 минг тон юзюм къайтармагъа гёз алгъа тутулгъан болгъан. Тек не хайыр, гьали-гьалилерде Дагъыстанны тавтюп ва тюзлюк бойдагъы районларында явгъан бурчакъ бузну заралындан Къарабудагъгент районну толу тюшюм береген юзюмлюклеринде борлалар тас этивлеге тарыды.
Бугюнлерде Дагъыстанны Гьукуматыны Председателини заместители Абдулмуталим Абдулмуталибов ва «Дагвинону» начальниги Шериф Керимханов юзюм оьсдюрювчюлени арзаларына гёре лап да кёп зарал тийген Къарабудагъгентни ва Уллубийавулну юзюм бавларында болду.
Шериф Керимханов бизге билдирген кюйде, эки де юртну авлакъларында юзюмлюклени толу тюшюм береген 375 гектар майданы заралгъа тарыгъан. Дагъы да ачыкъ этип айтгъанда, юзюмлюклерде тюшюмню 30-70 процентлери зараллангъаны токъташдырылгъан.
Болгъан заралны алдын алмакъ учун А. Абдулмуталибов Шериф Керимхановгъа, районну юрт хозяйство управлениесини башчылары ва касбучулары булан гьакълашып, тийишли чараланы гёрмеге тапшурув берген.
Буйнакск районда 90 гектар майданда ерлешген юзюмлюклеге явгъан бурчакъ бузну натижасында зарал болмагъаны гьакъда айрыча эсгермеге тюше.
– Озокъда, бурчакъ токъалап тюшюрген яшыл юзюм салкъынланы къайтармагъа болмажакъ, – деген Шериф Керимханов. – Зараллангъан, яралангъан бутакъланы къысгъа болжалны ичинде бутап тайдырмагъа ва арты булан дарман урув чараланы оьтгермеге таклиф этилине. Шону учун харж булан да кёмек болажакъ.
