Гьали-гьалилерде Росгвардияны Дагъыстандагъы управлениесини къуллукъчулары Донбасны миллетчилерден азат этив учун юрюлеген гьаракатны ортакъчыларына багъышлангъан «Биз бирчебиз» деген чарада ортакъчылыкъ этди. Шонда Росгвардияны асгер оркестрыны йыраву Юлдуз Липинская (Валиева) ортакъчылыкъ этди, «Къумукъ халкъым» ва «Мени Кавказым» деген йырланы йырлады.
Юлдузну англы тавушу янгыз погон гийгенлеге чи нечик де, къумукъ халкъгъа да кёпден белгили. Ол оьзю Эрпелиде белгили макъамы кёп агьлюде тувгъан. Агъачкъомуз согъуп йырлайгъан Вали Валиевни ва аргъан согъуп йырлайгъан Зугьраханымны кёп адам таный. Олар юртдагъы хорну ортакъчылары да дюр эди. Агьлюдеги уьч къызны бириси Юлдузгъа ата-анасыны пагьмусу юкъгъан. Ол гиччилей йырлама башлагъан буса да, башлап Буйнакск шагьардагъы кооператив коллежни битдире, тек касбусуна гёре ишлемей.
Йырлагъа гьашыкъ Юлдуз Магьачкъаладагъы музыка училищеге тюше ва шону уьстюнлю кюйде тамамлай. Артындагъы йыл буса Дагъыстан пачалыкъ педагогика институтну музыка факультетине тюше ва янаша оьзю сюеген касбуну юрютюп де тура.
Юлдуз оьтген заманны ичинде кёп санавдагъы концертлерде, фестивалларда ва конкурсларда уьстюнлю кюйде ортакъчылыкъ этген. Шогъар ону кёп санавдагъы грамоталары ва дипломлары шагьатлыкъ эте.
– Мен Бурлият Элмурзаеваны, Зайнап Абсаматованы, Патимат Гьюсейнованы, Лайла Алиеваны йырларын бек ушатаман, олар булан къурдашлыкъ юрютемен ва олардан кёп затгъа уьйренемен. Шаирлени айтсам, мени кёп йырларымны Магьаммат Атабаев, Бадрутдин Магьамматов, Патимат Гьюсейнова, Шарапутдин Сулейманов, Гебек Къонакъбиев ва башгъалары язгъан.
2005-нчи йылда Юлдуз генерал Валерий Липинскийге эрге чыгъа ва ол къуллукъ этеген Ростов шагьардагъы асгер бёлюкню оркестрыны йыраву болуп ишлей. 2008-нчи йылда генерал террорчуланы къолундан оьле. Сержант Юлдуз Липинская уланы Вали де булан Дагъыстангъа къайта ва мунда ерлешген Росгвардияны оркестрына ишге тюше. Ол бугюнлерде де шонда ишлей.
– Асгерде къуллукъ этегеним 14 йыл бола, дыгъар булан дагъы да ишлеме хыялым бар, – дей ол мени булангъы лакъырында. – Мен асгерде къуллукъ этемен ва бары да низам магъа да тие. Бары да чараларда ортакъчылыкъ этемен, гьатта командировкалагъа да бараман. Олай десем де, ана тилимдеги йырланы концертлери болса, биринден де къалмай ортакъчылыкъ этемен.
Юлдузну уланы 9-нчу класда охуй, анасыны йыргъа гьаваслыгъы онда да бар, школа чараларда йырлай, тек не касбуну сайлама сюегенин айтмай.
Шонча йыллар яшавун йыргъа багъышлагъан Юлдузну юлдузлу гюню де болду. 3-нчю ноябрде Дагъыстанны Башчысы Сергей Меликовну къарары булан Росгвардияны 6752 номерли асгер бёлюгюню оркестрыны ортакъчысы Юлдуз Валиевна Липинскаягъа «Дагъыстанны ат къазангъан артисткасы» деген ат берилди.
Биз Юлдузну гьакъ юрекден къутлайбыз ва дагъы да оьрлюклеге етишмекни ёрайбыз!
