«Къоркъунчсуз ёллар» деген милли проектге гёре, Дагъыстанда артдагъы 3 йылны ичинде кёп ёллар янгыртылып ва къурулуп тура. Шо ишлени бир гесеги Буйнакск районда да юрюле. Шонда «Магьачкъала-Буйнакск–Лаваша ва Оьр Гуниб» деген уллу ёл мукъаятлы ярашдырылып тура.
Республика оьлчевдеги шо ёл тав районланы ва Буйнакск шагьарны, районну юртларын тахшагьарыбыз булан байлай. Демек, шо ёл районланы яшавлукъ-экономика оьсювюне шайлы къошум эте.
Къурувчулар ёлну 2-нчи чакъырымында ерлешген кёпюрню де ярашдырдылар. Шону орнуна 45 метрлик генг кёпюр ишге салынды.
–Ёл юрюшлер бу бойда кёп болгъан ва ёлну генглешдирмесе бажарылмай эди, – дей Дагъыстанны транспортуна ва ёл ишлерине къарайгъан министр Жамболат Салавов. – Гетген йыл биз 4 чакъырым ердеги ёлну ишге салдыкъ, бу йыл 7 чакъырым къуражакъбыз. Бары да ердеги къурулушлар тергевню тюбюнде. Шу ерде бугюн 60 техника ва 100-ге ювукъ адам ишлей. Бары да ишлер дыгъарда язылгъан замангъа гёре юрюле. Ёлну биз бу йылны октябр айына битмеге герекбиз.
Гертиден де, шо ерде ишлер юрюлеген кюйню гьар оьтеген де гёре ва сююне. Ишчилер гьайванлагъа ёлну тюбюнден чыкъма ва сув быргъылар оьтеген ерлени къура, ёл белгилени сала ва ёл хырлагъа аманлыкъны темирлерин тута. Айрыча бригада гьазирленген ерге асфальт сала. Ишлер бир мюгьлетге де токъталмай юрюле.
